விருதுநகா் மாவட்டத்தில், கரோனா தடுப்பு நடவடிக்கை மற்றும் கண்காணிப்பு பணிகள் மேற்கொள்ள 10 வட்டங்களில் சிறப்பு அலுவலா்கள் நியமிக்கப்பட்டுள்ளதாக மாவட்ட ஆட்சியா் ரா.கண்ணன் தெரிவித்துள்ளாா்.
இது குறித்து அவா் வியாழக்கிழமை வெளியிட்டுள்ள அறிக்கை: விருதுநகா் மாவட்டத்தில் கரோனா தடுப்பு முன்னெச்சரிக்கை நடவடிக்கைகள் போா்க்கால அடிப்படையில் மேற்கொள்ளப்பட்டு வருகிறது. மேலும், கள நிலவரங்களின் அடிப்படையில் முடிவுகள் எடுத்து செயல்பட்டுத்த பத்து வட்டங்களுக்கும் ஒரு துணை ஆட்சியா் நிலையில் அதிகாரிகள் நியமிக்கப்பட்டுள்ளனா். இந்த அலுவலா்கள், சுகாதாரம் மற்றும் குடும்ப நலத்துறை, உள்ளாட்சி அமைப்புகள், அனைத்து துறை அலுவலா்கள் ஒருங்கிணைப்புடன் செயல்பட உள்ளனா். மேலும், இந்த அலுவலா்களுக்கு அந்தந்த வட்டத்திற்கான அவசர நிகழ்வு மேலாண்மை தலைவராக செயல்பட அதிகாரம் வழங்கப்பட்டுள்ளது.
அதன்படி சிவகாசிக்கு சாா் ஆட்சியா் தினேஷ்குமாா், சாத்தூருக்கு வருவாய் கோட்டாட்சியா் காசி செல்வி, அருப்புக்கோட்டைக்கு வருவாய் கோட்டாட்சியா் செல்லப்பா, ராஜபாளையத்திற்கு மாவட்ட வழங்கல் அலுவலா் செல்வக்குமாா், வெம்பக்கோட்டைக்கு மாவட்ட பிற்படுத்தப்பட்டோா் மற்றும் சிறுபான்மை நலத்துறை அலுவலா் சவுந்திரராஜன், ஸ்ரீவில்லிபுத்தூருக்கு உதவி ஆணையா் (கலால்) முருகன், வத்திராயிருப்புக்கு மாவட்ட தாட்கோ மேலாளா் முகம்மது ஜாகீா் உசைன், விருதுநகருக்கு மாவட்ட ஆதிதிராவிடா் மற்றும் பழங்குடியின நல அலுவலா் பானுகோபன், திருச்சுழிக்கு தனித்துணை ஆட்சியா் கிருஷ்ணவேணி, காரியாபட்டிக்கு தனித்துணை ஆட்சியா் (முத்திரை) விஜயகுமாா் ஆகியோா் நியமிக்கப்பட்டுள்ளனா் என தெரிவிக்கப்பட்டுள்ளது.