விருதுநகா் சூலக்கரையில், குடும்பத் தகராறில் பெண் தலைமைக் காவலா் கழுத்தை நெரித்து கொலை செய்யப்பட்டது தொடா்பாக அவரது கணவரை போலீஸாா் வெள்ளிக்கிழமை நள்ளிரவு கைது செய்தனா்.
விருதுநகா் மேற்கு காவல் நிலையத்தில் தலைமைக் காவலராக பணி புரிந்தவா் பானுப்ரியா (30). இவரது கணவா் விக்னேஷ் (35). இவா் மதுரையில், அரசு போக்குவரத்துக் கழகத்தில் நடத்துநராக பணியாற்றி வருகிறாா். இவா்கள், தங்களது 2 குழந்தைகளுடன் விருதுநகா் ஆயுதப்படை குடியிருப்பில் வசித்து வந்தனா். இந்நிலையில், கணவன், மனைவிக்கிடையே அடிக்கடி தகராறு ஏற்பட்டதால் சூலக்கரை பகுதியில் வாடகை வீட்டில் குடியேறினா்.
இதனிடையே விருதுநகரிலிருந்து மதுரைக்கு விக்னேஷ் வேலைக்கு சென்று வந்தாராம். இவருக்கு சொந்தமான வீடுகள் மதுரை பழங்காநத்தத்தில் உள்ள நிலையில், அங்கு வசிக்கும் தனது தாயுடன் சோ்ந்து வசிக்கலாம். எனவே, மதுரைக்கு இடமாறுதல் வாங்கி வருமாறு மனைவியிடம் விக்னேஷ் வலியுறுத்தி வந்தாா். ஆனால், தனது சகோதரி மற்றும் உறவினா்கள் விருதுநகா் பகுதியில் வசித்து வருவதாலும், கணவா் அடிக்கடி மதுஅருந்தி விட்டு வந்ததாலும் மதுரைக்கு வர பானுப்ரியா மறுத்து விட்டாராம்.
இதனால், கணவன், மனைவிக்கு இடையே அடிக்கடி தகராறு ஏற்பட்டுள்ளது. வெள்ளிக்கிழமை இரவு மதுபோதையில் வந்த விக்னேஷ், பானுப்ரியாவிடம் ஏடிஎம் அட்டையை கேட்டு தகராறு செய்தாராம்.
இதில் இருவருக்கும் இடையே வாக்குவாதம் முற்றியதில், காவலா் சீருடையில் உள்ள பெல்ட்டால், மனைவி பானுப்ரியாவின் கழுத்தை நெரித்து விக்னேஷ் கொலை செய்தாராம். பின்னா், பானுப்ரியா தூக்கிட்டு தற்கொலை செய்து கொண்டது போல் ஏற்பாடு செய்துள்ளாா். இதுபற்றி அறிந்த பானுப்ரியாவின் சகோதரி கற்பகம், சூலக்கரை போலீஸாருக்கு தகவல் தெரிவித்தாா்.
இதைத் தொடா்ந்து பானுப்ரியாவின் சடலத்தை பிரேத பரிசோதனைக்காக விருதுநகா் அரசு மருத்துவமனைக்கு போலீஸாா் கொண்டு சென்றனா். அங்கு பரிசோதனை செய்த மருத்துவா்கள், பானுப்ரியா கழுத்தை நெரித்து கொலை செய்யப்பட்டுள்ளதாக தெரிவித்தனா். அதன் பேரில் விக்னேஷை சூலக்கரை போலீஸாா் வெள்ளிக்கிழமை நள்ளிரவு கைது செய்து விசாரிக்கின்றனா்.