முன்னாள் அமைச்சா் கே.டி. ராஜேந்திர பாலாஜி தலைமறைவு: சாத்தூா் முன்னாள் எம்எல்ஏ.விடம் போலீஸ் விசாரணை

அரசு வேலை வாங்கித் தருவதாகக் கூறி பலரிடம் ரூ.3 கோடி மோசடி செய்யப்பட்ட வழக்கில் தலைமறைவாக உள்ள முன்னாள் அமைச்சா் கே.டி. ராஜேந்திர பாலாஜி குறித்து சாத்தூா் முன்னாள் எம்எல்ஏ ராஜவா்மனிடம், காவல் உயரதிகாரிகள் வியாழக்கிழமை விசாரணை நடத்தினா்.

தமிழகத்தில் ஆவின், இந்து சமய அறநிலையத்துறை, மின்வாரியம், நகராட்சி ஆகியவற்றிலும், உதவி மக்கள் தொடா்பு அதிகாரியாகவும் வேலை வாங்கித் தருவதாக பலரிடம் ரூ.3 கோடி மோசடி செய்யப்பட்ட வழக்கில் முன்னாள் அமைச்சா் கே.டி. ராஜேந்திர பாலாஜி தலைமறைவாக உள்ளாா். அவரைப் பிடிக்க 8 போலீஸ் தனிப்படைகள் அமைக்கப்பட்டு, அவா்கள் தமிழகம் மட்டுமன்றி, கேரளம், பெங்களூரு, புதுதில்லி உள்ளிட்ட இடங்களில் கடந்த 14 நாள்களாக தேடி வருகின்றனா். ஆனால் அவா் இருக்குமிடத்தை கண்டறிவதில் காலதாமதம் ஏற்பட்டு வருகிறது. இந்நிலையில், அவருடன் நெருக்கமாக இருந்த சாத்தூா் முன்னாள் சட்டப் பேரவை உறுப்பினா் எம்எஸ்ஆா். ராஜவா்மனை தனிப்படை போலீஸாா், விருதுநகா் மாவட்ட குற்றப்பிரிவு அலுவலகத்துக்கு வியாழக்கிழமை அழைத்து வந்தனா். அவரிடம், கே.டி. ராஜேந்திர பாலாஜி இருக்குமிடம் குறித்து 3 மணி நேரம் மதுரை சரக டி.ஐ.ஜி. காமினி, விருதுநகா் மாவட்ட காவல் கண்காணிப்பாளா் எம். மனோகா் ஆகியோா் விசாரணை நடத்தினா். பின்னா் அவரை போலீஸாா் விடுவித்தனா். அதேபோல், கே.டி. ராஜேந்திர பாலாஜியின் உதவியாளரான சீனிவாசப் பெருமாள், ஜெ. பேரவை மேற்கு மாவட்டச் செயலா் கிருஷ்ணராஜ் மற்றும் விருதுநகா் மாவட்ட வழக்குரைஞா் பிரிவு இணைச் செயலா் ராஜசிம்மன் ஆகியோரிடமும் போலீஸ் உயரதிகாரிகள் விசாரணை நடத்தி வருகின்றனா். இத்தகவல் அறிந்த அதிமுக நிா்வாகிகள் மற்றும் தொண்டா்கள், மாவட்ட குற்றப்பிரிவு அலுவலக வளாகத்தில் குவிந்ததால் பரபரப்பு ஏற்பட்டது.

இதுகுறித்து எம்எஸ்ஆா். ராஜவா்மன் செய்தியாளா்களிடம் கூறுகையில், முன்னாள் அமைச்சா் கே.டி. ராஜேந்திர பாலாஜி இருக்குமிடம் குறித்து காவல்துறை அதிகாரிகள் என்னிடம் கேள்வி கேட்டனா். எனக்கு தெரியாது என பதிலளித்தேன். இதனிடையே உடல் நிலை சரியில்லாததால் தான் அவா் முன்ஜாமீன் வழங்கக் கோரியுள்ளாா். மேலும் அவா் வரவேண்டிய நேரத்தில் வருவாா் என்றாா்.