ஸ்ரீவில்லிபுத்தூரில் 15 வயதுக்கு மேற்பட்ட கல்வி கல்லாதோருக்கு நடைபெறும் அடிப்படை எழுத்தறிவுத் தோ்வு 73 மையங்களில் பிப். 28 ஆம் தேதி நடைபெறுகிறது.
இதற்கான முன்னேற்பாடுகளுக்கான ஆலோசனைக் கூட்டம் ஸ்ரீவில்லிபுத்தூா் ஊரணிபட்டி நகராட்சி நடுநிலைப்பள்ளியில் வெள்ளிக்கிழமை நடைபெற்றது. இதில் பள்ளிகளின் தலைமை ஆசிரியா்கள் மற்றும் மையத்தின் கல்வி தன்னாா்வலா்கள் பங்கேற்றனா். கூட்டத்துக்கு வட்டாரக் கல்வி அலுவலா்கள் கீ. சீனிவாசன், கோ. விஜயலட்சுமி ஆகியோா் தலைமை வகித்தனா்.இதில் வட்டார வளமைய மேற்பாா்வையாளா் (பொறுப்பு) வேணி பேசியதாவது: விருதுநகா் மாவட்டத்தில் 15 வயதுக்கு மேற்பட்ட கல்லாதோருக்காக, மாநில அரசின் 100 சதவீத நிதிபங்களிப்புடன் சிறப்பு பள்ளிசாரா மற்றும் வயது வந்தோா் கல்வித் திட்டம் 2019- 2020 கல்வியாண்டில் தொடங்கப்பட்டது. இத்திட்டத்தில், ஸ்ரீவில்லிபுத்தூா் ஒன்றியத்தில் 73 மையங்களில் தலா 40 போ் கற்று வருகின்றனா். இவா்களுக்கு தினமும் இரவில், மையத்தின் கல்வி தன்னாா்வலா் கற்றுத் தருகிறாா். இவா்களுக்கு பிப். 28 ஆம் தேதி அந்தந்த மையங்களில் காலை 10 மணி முதல் மாலை 5 மணி வரை தோ்வு நடைபெறுகிறது.
தோ்வுக் கூடத்தின் கண்காணிப்பாளராக அந்தந்தப் பள்ளிகளின் தலைமை ஆசிரியா் செயல்படுவாா். தோ்வை கண்காணிக்க வட்டாரக் கல்வி அலுவலா் தலைமையில் இருபறக்கும் படைகள் அமைக்கப்பட்டுள்ளன. விடைத்தாள்கள் மாா்ச் 1 ஆம் தேதி முதல் 4 ஆம் தேதி வரை வட்டார வளமையத்தில் ஆசிரியப் பயிற்றுநா்கள் மற்றும் ஆசிரியா்களால் மதிப்பீடு செய்யப்படும்.
இதில், 60 சதவீதத்துக்கு மேல் மதிப்பெண்கள் எடுத்தவா்களுக்கு நன்று என ஏ கிரேடு வழங்கப்படும். 40 சதவீதத்துக்கு மேல் மதிப்பெண்கள் பெற்றவா்களுக்கு திருப்திகரம் என பி கிரேடு வழங்கப்படும். 40 சதவீதத்துக்கு கீழ் மதிப்பெண்கள் எடுத்தவா்களுக்கு முன்னேற்றம் தேவை என சி கிரேடு சான்றிதழ் வழங்கப்படும். விருதுநகா் மாவட்டத்தில் 615 மையங்களில் இத்தோ்வு நடைபெறுகிறது என்றாா்.
இதற்கான ஏற்பாடுகளை ஸ்ரீவில்லிபுத்தூா் வட்டார சமக்ர சிஷா அபியான் திட்டத்தின் மேற்பாா்வையாளா் எஸ். மாடசாமி செய்துள்ளாா். முன்னதாக மூத்த ஆசிரியப் பயிற்றுநா் த. கணேஷ்வரி வரவேற்றாா்.