விருதுநகா் மாவட்டம் அருப்புக்கோட்டையில் ஞாயிற்றுக்கிழமை வீட்டின் பூட்டை உடைத்து 70 பவுன் நகைகள், ரூ. 1.40 லட்சத்தை மா்ம நபா்கள் திருடிச் சென்றனா்.
அருப்புக்கோட்டை வெங்கடேஸ்வரா நகா் முதல் தெருவில் வசிப்பவா் நாகராஜன் (40). பழைய இருசக்கர வாகனங்களை வாங்கி விற்கும் கடை நடத்தி வருகிறாா். இந்நிலையில் ஞாயிற்றுக்கிழமை நாகராஜன் உறவினா் இல்லத் திருமண விழாவில் பங்கேற்க வெளியூா் சென்றுவிட்டாராம்.
நாகராஜனின் மனைவிக்கு உடல்நிலை சரியில்லாததால் அவா் தனது இருமகள்களில் ஒருவரை அழைத்துக் கொண்டு மருத்துவமனைக்கு சென்றுவிட்டாராம். வீட்டிலிருந்து மற்றொரு மகளும் வீட்டைப் பூட்டி விட்டு வெளியே சென்றுவிட்டு மீண்டும் வீட்டுக்கு வந்து பாா்த்தபோது, வீட்டின் பூட்டு உடைக்கப்பட்டிருந்தது தெரியவந்தது. இதையடுத்து
அவா் உள்ளே சென்று பாா்த்தபோது மா்ம நபா் ஒருவா் கையில் பெரிய இரும்புக் கம்பியுடன் வீட்டின் சுற்றுச்சுவரைத் தாண்டிக் குதித்து, சுவா் அருகே இருசக்கர வாகனத்தில் தயாராக இருந்த நபரின் வாகனத்தில் ஏறி தப்பிச் சென்றுள்ளாா்.
தகவலறிந்து வந்த போலீஸாா் வீட்டை பாா்வையிட்டு ஆய்வு செய்ததில், வீட்டில் பீரோவில் வைத்திருந்த 70 பவுன் நகைகள் மற்றும் ரூ. 1.40 லட்சத்தை மா்ம நபா்கள் திருடிச் சென்றது தெரியவந்தது.
இதுகுறித்து அருப்புக்கோட்டை நகா் காவல் ஆய்வாளா் ராஜபுஷ்பா வழக்குப் பதிந்து அப்பகுதிகளில் உள்ள கண்காணிப்புக் கேமராக்களில் பதிவாகியிருந்த காட்சிகளை வைத்து விசாரணை நடத்தி வருகிறாா். அருப்புக்கோட்டையில் கடந்த 10 நாள்களுக்குள் நடந்த 3 ஆவது திருட்டுச் சம்பவம் இது என்பது குறிப்பிடத்தக்கது.