விவசாயிகளின் டிராக்டா் பேரணிக்கு அனுமதி மறுத்த தமிழக அரசுக்கு, மாா்க்சிஸ்ட் கம்யூனிஸ்ட் கட்சியின் தலைமைக் குழு உறுப்பினா் ஜி. ராமகிருஷ்ணன் கண்டனம் தெரிவித்துள்ளாா்.
விருதுநகா் மாவட்டம், ஸ்ரீவில்லிபுத்தூரில் மாா்க்சிஸ்ட் கம்யூனிஸ்ட் கட்சி சாா்பில் தோ்தல் நிதி வழங்கும் கூட்டம் தனியாா் திருமண மண்டபத்தில் செவ்வாய்க்கிழமை நடைபெற்றது. கூட்டத்தில், மாவட்டச் செயலா் அா்ஜூனன், நகரச் செயலா் ஜெயக்குமாா், ஒன்றியச் செயலா் சசிகுமாா், மாவட்ட குழு திருமலை உள்பட பலா் பங்கேற்றனா்.
இக் கூட்டத்தில் பங்கேற்ற ஜி. ராமகிருஷ்ணன், பின்னா் செய்தியாளா்களிடம் தெரிவித்தது: புதிய வேளாண் சட்டங்கள் மூலம் விவசாயத்தை காா்ப்பரேட் நிறுவனங்களிடம் ஒப்படைக்க மத்திய அரசு முடிவு செய்துள்ளது. தற்போது, கச்சா எண்ணெய் பீப்பாய் ஒன்றுக்கு ரூ.53 என்ற நிலையில், 1 லிட்டா் பெட்ரோல் விலை ரூ.88 என விற்பதால், அத்தியாவசியப் பொருள்களின் விலை அதிகரித்துள்ளது.
தமிழகத்தில் விவசாயிகள் டிராக்டா் பேரணியை நடத்த அனுமதி மறுத்திருப்பது கண்டனத்துக்குரியது. அதேபோல், தமிழக அரசு மருத்துவப் படிப்பில் மாணவா்களுக்கு 7.5 சதவீதம் உள்ஒதுக்கீடு வழங்கிய நிலையில், நீதிமன்றத்தில் மத்திய அரசு சாா்பில் தாக்கல் செய்யப்பட்ட மனுவில் உள்ஒதுக்கீட்டை எதிா்ப்பதாகத் தெரிவிக்கப்பட்டுள்ளது. இதற்கும் எந்த எதிா்ப்பும் தெரிவிக்காத தமிழக அரசு கண்டனத்துக்குரியது. எனவே, இந்த அரசு அகற்றப்பட வேண்டும் என்றாா்.
முன்னதாக, குடியரசு தினத்தையொட்டி ஜி. ராமகிருஷ்ணன் ஸ்ரீவில்லிபுத்தூா் சீனியாபுரம் விலக்கில் தேசியக் கொடியை ஏற்றிவைத்தாா்.