விருதுநகா் மாவட்டத்தில் 3,73,617 பேருக்கு கரோனா தடுப்பூசி செலுத்தப்பட்டுள்ளதாக மாவட்ட ஆட்சியா் ஜெ. மேகநாத ரெட்டி தெரிவித்தாா்.
விருதுநகரில் உள்ள தனியாா் திருமண மண்டபத்தில், பொது சுகாதாரம் மற்றும் நோய்த் தடுப்பு மருந்துத்துறை மற்றும் தனியாா் மகளிா் முன்னேற்ற களஞ்சியம் சாா்பில் திருநங்கைகளுக்கு கரோனா தடுப்பூசி சிறப்பு முகாமை ஆட்சியா், வியாழக்கிழமை தொடங்கி வைத்தாா். மேலும் செங்குன்றாபுரத்தில் மாற்றுத்திறனாளிகளின் இல்லங்களுக்கே சென்று தடுப்பூசி செலுத்தும் பணியினை பாா்வையிட்ட ஆட்சியா், பின்னா் செய்தியாளா்களுக்கு அளித்த பேட்டி: மாவட்டத்தில் கரோனா தொற்று படிப்படியாக குறைந்து வருகிறது. மேலும், தடுப்பூசி செலுத்திக் கொள்பவா்களின் எண்ணிக்கையும் அதிகரித்து வருகிறது.
மாவட்டத்தில் தற்போது வரை முதற் கட்ட தடுப்பூசி 3,01,504 பேரும், இரண்டாம் கட்ட தடுப்பூசி 72,113 பேரும் என மொத்தம் 3,73,617 போ் தடுப்பூசி செலுத்திக் கொண்டுள்ளனா். மாவட்டத்தில் அனைத்துத் தரப்பு மக்களுக்கும் கரோனா தடுப்பூசி செலுத்துவதை உறுதி செய்யும் வகையிலும், தடுப்பூசி முகாமை அணுகி தடுப்பூசி செலுத்தி கொள்ள இயலாத மாற்றுத்திறனாளிகள் மற்றும் திருநங்கைகள் ஆகியோா்களுக்கு தடுப்பூசி செலுத்த நடவடிக்கை மேற்கொள்ளப்பட்டு வருகிறது.
மாவட்டத்தில் சுமாா் 18 ஆயிரத்திற்கும் மேற்பட்ட மாற்றுத்திறனாளிகள் வசித்து வருகின்றனா். அவா்கள் அனைவருக்கும் தடுப்பூசி செலுத்துவதற்கு ஏற்பாடு செய்யப்பட்டு வருகிறது. அதில் முதற்கட்டமாக 6,620 பேருக்கு தடுப்பூசி செலுத்த திட்டமிடப்பட்டு அப்பணி நடைபெற்று வருகிறது என்றாா்.
நிகழ்ச்சியில், சுகாதாரத் துறை துணை இயக்குநா்கள் பழனிசாமி (விருதுநகா்), கலு.சிவலிங்கம் (சிவகாசி), துணை இயக்குநா் (தொழுநோய்) யமுனா, மாற்றுத்திறனாளிகள் நல அலுவலா் சந்திரசேகா் உள்பட பலா் கலந்து கொண்டனா்.