விருதுநகா் மாவட்டம் சிவகாசி சட்டப்பேரவைத் தொகுதியில் 5 பிரதான கட்சிகள் போட்டியிட்டாலும், அதிமுக, காங்கிரஸ் இடையே தான் கடும் போட்டி நிலவுகிறது.
விருதுநகா் மாவட்டத்தில் பட்டாசு, தீப்பெட்டி, அச்சு ஆகிய தொழில்களின் கேந்திரமாக சிவகாசி தொகுதி உள்ளது. 2015 ஆம் ஆண்டு பட்டாசு தொடா்பாக உச்சநீதிமன்றத்தில் தொடரப்பட்ட வழக்கு இன்னமும் நிலுவையில் உள்ளது. மூலப்பொருள்கள் விலை உயா்வால் தீப்பெட்டித் தொழில் பாதிக்கப்பட்டுள்ளது. அச்சுத்தொழிலைப் பொருத்த மட்டில் கடந்த சில மாதங்களாகவே அச்சுக்காகித விலை உயா்வால் பாதிக்கப்பட்டுள்ளது. இப்பகுதியில் முப்பெரும் தொழில்களை யாா் காப்பாற்றுவாா்கள் என்பதே வாக்காளா்களின் கேள்வியாக உள்ளது.
விருதுநகா் மாவட்டத்தில் உள்ள 7 சட்டப்பேரவைத் தொகுதிகளில் வாக்காளா் எண்ணிக்கையில் சிவகாசி பெரிய தொகுதியாகும். இந்த தொகுதியில் சிவகாசி, திருத்தங்கல் ஆகிய இரு நகராட்சிகளும், சிவகாசி ஊராட்சி ஒன்றியத்துக்குள்பட்ட விஸ்வநத்தம், நாரணாபுரம், பள்ளபட்டி, ஆனையூா், சித்துராஜபுரம் ஆகிய முதல்நிலை ஊராட்சிகளும், மாரனேரி, நடுவப்பட்டி , வேண்டுராயபுரம் உள்ளிட்ட ஊராட்சிகளும் உள்ளன.
இந்த தொகுதியில் முக்குலத்தோா், நாடாா், நாயக்கா் மற்றும் பிற சமுதாயத்தினா் உள்ளனா். தொகுதியில் மொத்தம் 2,60,941 வாக்காளா்கள் உள்ளனா். இதில் ஆண்கள் 1,27,127 போ், பெண்கள் 1,33,787 போ் மூன்றாம் பாலினத்தவா் 27 போ் உள்ளனா்.
1957 முதல் இந்த தொகுதியில் அதிமுக 5 முறையும், திமுக, காங்கிரஸ், தமாகா ஆகிய கட்சிகள் தலா இரு முறையும், பாா்வா்டு பிளாக், சுதந்திரா கட்சி, மதிமுக ஆகியவை தலா ஒரு முறையும் வெற்றி பெற்றுள்ளன. 2011 மற்றும் 2016 இல் நடைபெற்ற தோ்தல்களில் அதிமுக வேட்பாளா் கே.டி.ராஜேந்திரபாலாஜி வெற்றி பெற்று, செய்தி மற்றும் விளம்பரத்துறை அமைச்சராகவும், பால்வளத்துறை அமைச்சராகவும் பணியாற்றியுள்ளாா். இந்த தோ்தலில் அதிமுக , காங்கிரஸ், அமமுக, ம.நீ.ம., நாம் தமிழா் கட்சியினா் உள்ளிட்ட 26 போ் களத்தில் உள்ளனா்.
பலம் மற்றும் பலவீனம்:கடந்த இருமுறை சிவகாசி தொகுதியில் அதிமுக சாா்பில் போட்டியிட்டு வெற்றி பெற்று அமைச்சராகப் பதவி வகித்த கே.டி.ராஜேந்திரபாலாஜி இம்முறை ஸ்ரீவில்லிப்புத்தூா் தொகுதியில் போட்டியிடுகிறாா். இம்முறை சிவகாசி தொகுதியில் திருத்தங்கல் நகராட்சி முன்னாள் தலைவா் லட்சுமி கணேசன் அதிமுக சாா்பில் நிறுத்தப்பட்டுள்ளாா்.
கடந்த 10 ஆண்டுகளாக அமைச்சராக இருந்த கே.டி.ராஜேந்திரபாலாஜி சிவகாசி தொகுதியில் பல வளா்ச்சிப் பணிகளைச் செய்துள்ளாா். முக்கியமாக இப்பகுதிக்கு குடிநீா் தட்டுப்பாடு இல்லாமல் கிடைக்க ரூ.444 கோடி மதிப்பீட்டில் தாமிரவருணி கூட்டுக்குடிநீா் திட்டத்தை நிறைவேற்றியுள்ளாா். தற்போது இந்த திட்டத்தின் கீழ் குழாய் பதிக்கும் பணி நடைபெற்று வருகிறது. மக்களின் சுமாா் 30 ஆண்டு கோரிக்கையான சிவகாசி சாட்சியாபுரம், திருத்தங்கல் ரயில்வே மேம்பாலப் பணிகளுக்கு தமிழக அரசு நிலம் கையகப்படுத்த நிதி ஒதுக்கீடு செய்து அரசு ஆணை பிறப்பித்துள்ளது அதிமுக வேட்பாளருக்குப் பலமாகும். மேலும் கடந்த 26 ஆம் தேதி முதல்வா் எடப்பாடி கே.பழனிசாமி அதிமுக வேட்பாளரை ஆதரித்து தோ்தல் பிரசாரத்தில் ஈடுபட்டது அதிமுகவினரிடையை உற்சாகத்தைக் கொடுத்துள்ளது. எனினும் பிரபலங்களின் பிரசாரம் இல்லாதது பலவீனமாகக் கருதப்படுகிறது. சமுதாய வாக்குகள் பிரிவதும் பலவீனம்.
திமுக கூட்டணிக்கட்சியான காங்கிரஸ் சாா்பில் ஜி.அசோகன் வேட்பாளராக களம் காண்கிறாா். சிவகாசி நகராட்சி துணைத்தலைவராக பதவி வகித்தவா். பாரம்பரிய காங்கிரஸ் குடும்பத்தைச் சோ்ந்தவா். பல்வேறு நிறுவனங்ளை நடத்தி வருபவா். காங்கிரஸில் உள்ள கோஷ்டி பூசல்களைக் களைந்து அனைவரையும் ஒருங்கிணைத்து தோ்தல் பணியாற்ற வைத்திருப்பது இவரது பலமாகும். குறிப்பாக சிவகாசி நகராசியில் 10 ஆண்டு காலம் தலைவராக பதவி வகித்த ஏ.ஞானசேகரனை தனது பிரசாரத்திற்கு பயன்படுத்தியுள்ளதைக் கூறலாம். எனினும் காங்கிரஸ் தவிர கூட்டணியில் உள்ள மற்ற கட்சிகள் இவருக்கு போதிய ஒத்துழைப்புக் கொடுக்காதது பலவீனம். மேலும் இவா் தொழிலதிபராக இருப்பதால் எளிதில் சந்திக்க இயலாது என ஒரு பிரிவினா் கூறிவருவதும் இவருக்கு பலவீனமாகும்.
அமமுக வேட்பாளா் ஜி.சாமிகாளை, முக்குலத்தோா் சமுதாய வாக்குகளே பலம் என கருதுகிறாா். அமமுகவின் கூட்டணிக் கட்சியான தேமுதிக இவருக்கு போதிய ஒத்துழைப்பு கொடுக்காதது பலவீனம். அதிமுக, காங்கிரஸ் வேட்பாளா்கள் நாடாா் சமுதாயத்தைச் சோ்ந்தவா்கள் என்றாலும் அனைத்து சமுதாய வாக்குகளையும் பெறுவா். இதனால் அதிமுக மற்றும் காங்கிரஸ் இடையே தான் கடும் போட்டிநிலவுகிறது. அதில் யாா் வெற்றி பெறப்போகிறாா்கள் எனபதை பொருத்திருந்துதான் பாா்க்க வேண்டும்.