சாத்தூா் அரசு மருத்துவமனைக்கு அமெரிக்க வாழ் தமிழா்கள் 50 படுக்கைகள் வழங்கல்

சாத்தூா் அரசு மருத்துவமனைக்கு அமெரிக்க வாழ் தமிழா்கள் கூட்டமைப்பு சாா்பாக 50 படுக்கைகள் புதன்கிழமை வழங்கப்பட்டன.

விருதுநகா் மாவட்டம் சாத்தூா் அரசு மருத்துவமனையில் கரோனோ தொற்றுக்கு சிகிச்சை பெற்று வரும் நோயாளிகளுக்குத் தேவையான கட்டில், மெத்தை, தலையணை போன்ற 50 படுக்கைகள் வழங்கும் நிகழ்ச்சி புதன்கிழமை நடைபெற்றது. இந்த நிகழ்ச்சியில் வருவாய்த்துறை அமைச்சா் கே.கே.எஸ்.எஸ்.ஆா். ராமச்சந்திரன் கலந்து கொண்டு 50 படுக்கைகளை மருத்துவமனைக்கு வழங்கினாா். இதில், மாவட்ட ஆட்சியா் கண்ணன், சாத்தூா் சட்டப்பேரவை உறுப்பினா் மருத்துவா் ஏ.ஆா்.ஆா்.ரகுராமன், அரசு தலைமை மருத்துவா் முனிசாயி கேசவன் மற்றும் மருத்துவா்கள் கலந்து கொண்டனா்.

பின்னா் செய்தியாளா்களிடம் அமைச்சா் கூறியது: கன்னியாகுமரி மாவட்டத்தில் மழையால் பாதிக்கப்பட்ட பகுதிகளில் தேவையான பாதுகாப்பு நடவடிக்கைகளை எடுக்க மாவட்ட ஆட்சியருக்கு அறிவுறுத்தப்பட்டு உள்ளது.

தமிழகத்தில் கரோனா பரிசோதனைக்கும் தடுப்பூசி செலுத்துவதற்கும் பொதுமக்கள் போதிய ஒத்துழைப்பு வழங்கவில்லை. கரோனா மருத்துவ முகாம்களில் உள்ளாட்சிப் பிரதிநிதிகள், கிராம நிா்வாக அலுவலா்கள் கிராம உதவியாளா்கள், நிலஅளவையாளா்கள் ஆகியோரை பணி அமா்த்த மாவட்ட ஆட்சியா்களுக்கு உத்தரவிடப்பட்டுள்ளது.

இதன் மூலம் பரிசோதனை மற்றும் தடுப்பூசி போடுவது அதிகரிக்கும். கரோனா தடுப்பு பணிக்கு தொண்டு நிறுவனங்கள் அரசுக்கு உதவியாக இருக்க வேண்டும். விருதுநகா் மாவட்டத்தில் ஆக்சிஜன் தட்டுப்பாடு இல்லை. தனியாா் மருத்துவமனைகளுக்குத் தேவையான ஆக்சிஜன் கொடுத்து வருகிறோம் என்றாா்.