கலைஞா் வீடு திட்டத்தில் போலி ஆணை வழங்கி மோசடி: தற்காலிக பணிநீக்கம் செய்த ஊழியா் மீது வழக்கு

தற்காலிக பணி நீக்கம் செய்யப்பட்ட ஊராட்சி ஒன்றிய ஊழியா், கலைஞா் வீடு கட்டும் திட்டத்தில் போலி ஆணை வழங்கியதாக புகாரின் பேரில் போலீஸாா் செவ்வாய்க்கிழமை வழக்குப் பதிவு செய்தனா்.

விருதுநகா் மாவட்டம் நரிக்குடி ஊராட்சி ஒன்றிய அலுவலகத்தில் இளநிலை உதவியாளராகப் பணிபுரிந்தவா் நாகேந்திரன். இவா், சில மாதங்களுக்கு முன்பு அங்கன்வாடி, சத்துணவு மையங்களில் வேலை வாங்கித் தருவதாக ரூ.பல லட்சம் மோசடி செய்தாா். மேலும், அவா்களுக்கு மாவட்ட ஆட்சியா் கையெழுத்திட்டது போல் போலி பணி நியமன ஆணைகளையும் வழங்கினாா். இதையடுத்து அவா் தற்காலிக பணி நீக்கம் செய்யப்பட்டாா்.

இந்நிலையில் காரியாபட்டி அருகேயுள்ள கிழவனேரி கிராம ஊராட்சித் தலைவா் காா்த்திக் என்பவரை நாகேந்திரன், கைப்பேசியில் தொடா்பு கொண்டுள்ளாா். அப்போதுதான் மாவட்ட ஆட்சியா் அலுவலகத்தில் உள்ள ஊரக வளா்ச்சித் துறையில் கலைஞா் வீடு கட்டும் பிரிவில் பணி புரிவதாக தெரிவித்துள்ளாா். கிழவனேரி ஊராட்சிக்கு இத்திட்டத்தில் இரண்டு வீடுகள் மட்டுமே ஒதுக்கப்பட்டுள்ளன. கூடுதல் வீடுகள் ஒதுக்க வேண்டு மெனில் வீடு ஒன்றுக்கு ரூ.6 ஆயிரம் வீதம் தர வேண்டும் என தெரிவித்தாராம். இதை நம்பி ஊராட்சி மன்றத் தலைவா் பல்வேறு தவணைகளில் ரூ.60 ஆயிரம் வழங்கியுள்ளாா். அதைத்தொடா்ந்து புதிய வீடுகளுக்கான ஆணையை நாகேந்திரன் கொடுத்துள்ளாா்.

அதை காரியாபட்டி வட்டார வளா்ச்சி அலுவலரிடம் ஊராட்சி மன்றத் தலைவா் காட்டிய போது தான் போலி ஆணை என்பது தெரிய வந்தது. இது குறித்து கிழவனேரி ஊராட்சித் தலைவா் அளித்த புகாரின் பேரில் நாகேந்திரன் மீது காரியாபட்டி போலீஸாா் வழக்குப் பதிந்து தேடி வருகின்றனா். நாகேந்திரன் காரியாபட்டி பகுதியில் மேலும் சில ஊராட்சி மன்றத் தலைவா்களிடம், கலைஞா் வீடு திட்டத்தில் ஆணை வழங்குவதாக பண மோசடி செய்திருப்பதாகவும் போலீஸ் விசாரணையில் தெரிய வந்துள்ளது.