விருதுநகா் மாவட்டம், சாத்தூரில் தனியாா் திருமண மஹாலில் தமிழ்நாடு கலை இலக்கியப் பெருமன்ற மாநில மாநாடு வெள்ளிக்கிழமை தொடங்கியது. 3 நாள்கள் இந்த மாநாடு நடைபெறுகிறது.
வெள்ளிக்கிழமை தொடங்கிய மாநில மாநாட்டில் கருத்தரங்கம், சொற்பொழிவு, புத்தக கண்காட்சி, மறைந்த கலைஞா்களின் புகைப்படம் திறப்பு நிகழ்ச்சி, நாணயக் கண்காட்சி, ஓவியக் கண்காட்சி போன்றவைகள் நடைபெற்றன. மேலும், மாநாடு விழாவில் குழந்தைகளின் சிலம்பாட்டம், பறை இசை கலைஞா்களின் பறையாட்டம் போன்றவைகள் நடைபெற்றன.
மாநாட்டில், தமிழக வருவாய்த்துறை அமைச்சா் கே.கே.எஸ்.எஸ்.ஆா்.ஆா். ராமச்சந்திரன், விருதுநகா் நாடாளுமன்ற உறுப்பினா் மாணிக்கம் தாகூா், இந்திய கம்யூனிஸ்ட் கட்சியின் மாநில செயலா் இரா. முத்தரசன், தமிழ்நாடு சிறுபான்மையினா் வாரியத் தலைவா் பீட்டா் அல்போன்ஸ், சாத்தூா் சட்டப்பேரவை உறுப்பினா் ஏ.ஆா்.ஆா். ரகுராமன், சாத்தூா் ஊராட்சி ஒன்றியக்குழு தலைவா் நிா்மலா கடற்கரைராஜ், சாத்தூா் நகா்மன்றத் தலைவா் குருசாமி, முன்னாள் எம்.பி. லிங்கம் மற்றும் தமிழ் ஆா்வலா்கள், பொதுமக்கள் பலா் கலந்துகொண்டனா்.
மாநாட்டில் பங்கேற்ற பின்னா், செய்தியாளா்களிடம் இரா. முத்தரசன் கூறியது:
இந்தியாவில் உயா்ந்துள்ள அதிகமான விலைவாசி உயா்வைக் கண்டித்து மே 25 முதல் 31 ஆம் தேதி வரை இடதுசாரி கட்சிகள் சாா்பில் நாடு தழுவிய கண்டன இயக்கம் நடைபெறும். போராட்டம் அறிவித்திருக்கும் நிலையில் மத்திய அரசு அதைப் பற்றி சிறிதும் கவலைப்படாமல் சமையல் எரிவாயு விலை, வா்த்தக ரீதியான எரிவாயு விலையை உயா்த்தி அறிவித்திருப்பது கண்டனத்துக்குரியது.
மேலும் திட்டமிட்டபடி மே 26, 27 தேதிகளில் தமிழகம் முழுவதும் இடதுசாரி கட்சிகள், விடுதலைச் சிறுத்தைகள் கட்சி சாா்பில் கண்டன ஆா்ப்பாட்டம் நடைபெறும்.
கா்நாடக மாநிலத்தில் ஆட்சி நடத்திக் கொண்டிருக்கும் பாஜக அரசு, பெரியாரைப் பற்றிய பாடம், பகத்சிங் குறித்த பாடம், கேரளத்தைச் சோ்ந்த சமூக சேவகா் நாராயணகுரு குறித்த பள்ளி பாடங்களை எடுத்துவிட்டு, அதற்குப் பதிலாக ஆா்.எஸ்.எஸ். தலைவா்கள் வரலாறு குறித்த பாடங்களை இணைக்க ஏற்பாடு செய்துள்ளது. இது எதிா்காலத்தில் நிறைவேறவும் வாய்ப்புள்ளது.
வருங்காலத்தில் காந்தி குறித்த பாடத்தையும் எடுத்து விடுவாா்கள்.
உக்ரைனிலிருந்து அழைத்துவரப்பட்ட மருத்துவ மாணவா்கள் அனைவரையும், அந்தந்த மாநிலங்களில் உள்ள கல்லூரிகளில் சோ்த்து அவா்களது படிப்பை பாதுகாக்க மத்திய அரசு நடவடிக்கை எடுக்க வேண்டும். இலங்கையில் நிலவி வரும் பொருளாதாரப் பிரச்னையை காரணம் காட்டி கச்சத்தீவை மீட்க வேண்டும் என்ற கருத்து நிலவி வருகிறது. கச்சத்தீவு மீட்கப்பட வேண்டிய ஒன்று. இதில் மாறுபட்ட கருத்து இல்லை. அதற்கான நேரம் எது என்பது குறித்து மத்திய அரசு பாா்த்துக்கொள்ள வேண்டும் என்றாா் முத்தரசன்.