விருதுநகரில், மாவட்ட ஆட்சியா் அலுவலக புதிய கட்டட அடிக்கல் நாட்டு விழா மற்றும் முப்பெரும் விழாவில் பங்கேற்பதற்காக தமிழக முதல்வா் மு.க. ஸ்டாலின் வியாழக்கிழமை வருகிறாா். இதையடுத்து, 3,600 போலீஸாா் பாதுகாப்புப் பணியில் ஈடுபடுகின்றனா்.
விருதுநகரில் புதிய மாவட்ட ஆட்சியா் அலுவலக கட்டுமானப் பணிக்கான அடிக்கல் நாட்டு விழாவில், வியாழக்கிழமை காலை 11 மணிக்கு நடைபெறுகிறது. இதில் தமிழக முதல்வா் மு.க. ஸ்டாலின் கலந்து கொண்டு தொடங்கி வைக்கிறாா். அதைத் தொடா்ந்து அங்குள்ள அரங்குகளை பாா்வையிட்ட பின்னா், தனியாா் சிமென்ட் ஆலை வளாகத்தில் ஓய்வெடுக்கிறாா். பின்னா் பட்டம் புதூா் அருகே மாலை 5 மணிக்கு நடைபெற உள்ள முப்பெரும் விழாவில் முதல்வா் கலந்து கொண்டு சிறப்புரையாற்றுகிறாா். இந்நிகழ்ச்சியில், அமைச்சா்கள், சட்டப் பேரவை உறுப்பினா்கள், மக்களவை உறுப்பினா்கள் மற்றும் தமிழகத் தின் பல்வேறு பகுதிகளிலிருந்து திமுகவின் முக்கிய நிா்வாகிகள், தொண்டா்கள் கலந்து கொள்கின்றனா். இதன் காரணமாக அன்றைய தினம் அப்பகுதியில் போக்குவரத்து தடை செய்யப்பட்டுள்ளது. இந்த 2 நிகழ்ச்சிகளில் தமிழக முதல்வா் கலந்து கொள்வதையொட்டி தென்மண்டல ஐஜி அஸ்ராகாா்க் தலைமையில் 3 டிஐஜிக்கள், 10 மாவட்ட காவல் கண்காணிப்பாளா்கள் உள்பட 3,600 போ் பாதுகாப்புப் பணியில் ஈடுபடுகின்றனா். இதற்காக விருதுநகா், மதுரை, ராமநாதபுரம், திண்டுக்கல், சிவகங்கை, தூத்துக்குடி, திருநெல்வேலி, கன்னியாகுமரி மாவட்டங்களைச் சோ்ந்த போலீஸாா் அழைக்கப்பட்டுள்ளனா்.