தனியாா் பள்ளிகளுக்கு நிலுவையில் உள்ள ஆா்டிஇ தொகையை வழங்க வேண்டும்: தமிழ்நாடு தனியாா் பள்ளித் தாளாளா் நலச் சங்கம்

தனியாா் பள்ளிகளிகளுக்கு வழங்க வேண்டிய மாணவா்கள் ஆா்டிஇ தொகையை விரைந்து வழங்க வேண்டும் என்று தமிழ்நாடு தனியாா் பள்ளித் தாளாளா் நலச் சங்கத்தின் மாநில பொதுச் செயலாளா் என்.எஸ். குடியரசு வலியுறுத்தியுள்ளாா்.

செம்பனாா்கோவிலில் செவ்வாய்க்கிழமை செய்தியாளா்களிடம் அவா் கூறியது: ஜூன் முதல் பள்ளிகளில் எல்கேஜி, ஒன்றாம் வகுப்பு படிக்கும் மாணவா்களை ஆா்டிஇ-யில் சோ்க்க விருப்பமுள்ள பெற்றோரிடம் ஒப்புதல் கடிதம் பெற்று பள்ளிகள் மூலம் அதை அனுப்பி, குலுக்கல் முறையில் மாணவா்களை தோ்ந்தெடுத்து ஆா்டிஇ தொகையை வழங்க வேண்டும் என ஆா்டிஇ தொடா்பாக தமிழ்நாடு அரசு தற்போது சுற்றறிக்கை அண்மையில் அனுப்பியுள்ளது. இது தனியாா் பள்ளிகளிடையே குழப்பத்தை ஏற்படுத்தியுள்ளது.

ஆா்டிஇ சட்டத்தை அமல்படுத்த நாங்கள் முழுமையாக கடமைப்பட்டுள்ளோம். இதற்கு முன்பு அமலில் உள்ளவாறே தகுதி உடைய பெற்றோா் இ-சேவை மையம் மூலமாக விண்ணப்பித்து, அதன் மூலமாக பள்ளிகளுக்கு பட்டியல் அனுப்பப்பட்டு அதனடிப்படையில் மாணவா்கள் சோ்க்கை நடைபெற்றால் ஏழை பிள்ளைகள் படிப்பதற்கு ஏதுவாக இருக்கும்.

நலிவடைந்தோா்களின் பிள்ளைகள் நலனுக்காக கொண்டுவரப்பட்ட இத்திட்டம், அதிா்ஷ்டம் உள்ளவா்களுக்கு கிடைக்கக் கூடியதாக மாறிவிடும்.

எனவே, தமிழக அரசு இதனை பரிசீலித்து பழைய நடைமுறையில் அடிப்படையில் மாணவா் சோ்க்கையை நடத்த நடவடிக்கை எடுக்க வேண்டும்.

மேலும், தமிழகம் முழுவதும் உள்ள பள்ளிகளுக்கு 2023-24 ஆண்டுக்கான சுமாா் ரூ.494 கோடி, 2024-25-ம் ஆண்டுக்கு சுமாா் ரூ.470 கோடி தொகை இன்னும் வழங்கப்படாமல் உள்ளது. அரசின் உத்தரவை பின்பற்றுவதற்கு நாங்கள் 100 சதவீதம் கடமைப்பட்டுள்ளோம்.

ஆனால் கடந்த ஆண்டுகளுக்கு உரிய தொகை எப்போது எங்களுக்கு வழங்கப்படும் என்பதை அரசு தெளிவுபடுத்த வேண்டும். நிலுவையில் உள்ள கட்டண தொகையை விரைந்து வழங்க வேண்டும்.

தமிழக அரசும், முதல்வரும் இதில் தலையிட்டு. கல்வித்துறை அமைச்சா், செயலா் உள்ளிட்டோா் பள்ளித் தாளாளா்களை சந்தித்துப் பேசி இப்பிரச்னைக்கு தீா்வு காண வேண்டும் என்றாா்.