நாகை புதிய பேருந்து நிலையப் பணிகளை விரைவுபடுத்த வேண்டும்

நாகையில், புதிய பேருந்து நிலையப் பணிகளை விரைந்து முடிக்க வேண்டும் என்று நகா்மன்றக் கூட்டத்தில் வலியுறுத்தப்பட்டது.

நாகை நகா்மன்றக் கூட்டம், நகராட்சி கூட்ட அரங்கில் வெள்ளிக்கிழமை நடைபெற்றது. நகா்மன்றத் தலைவா் இரா. மாரிமுத்து தலைமை வகித்தாா். துணைத் தலைவா் செந்தில்குமாா், ஆணையா் லீனாசைமன் ஆகியோா் முன்னிலை வகித்தனா்.

கூட்டம் தொடங்கியதும், கரூரில் கூட்ட நெரிசலில் உயிரிழந்த 41 பேருக்கு மெளன அஞ்சலி செலுத்தப்பட்டது. தொடா்ந்து நடைபெற்ற விவாதத்தில் உறுப்பினா்கள் பேசியது:

கலா (திமுக): தாழ்வாகச் செல்லும் மின் வயா்களை மாற்றி அமைக்க வேண்டும்.

பரணிகுமாா் (அதிமுக): நாகை செல்லுாா் பகுதியில் புதிய பேருந்து நிலைய கட்டுமானப் பணிகள் தற்போதுதான் தொடங்கியுள்ளது. அதற்குள் புதிய பேருந்து நிலையத்தில் அமைய உள்ள கடைகளுக்கு ஏலம் விடுவதற்கு ஒப்புதல் பெறுவது எப்படி? ஏன் இவ்வளவு அவசரம். பணிகள் முடிந்த பின்னா் கடைகளுக்கு ஏலம் அறிவிக்க வேண்டும். பேருந்து நிலைய கட்டுமானப் பணிகளை விரைந்து முடிக்க வேண்டும்.

அக்கரைக்குளம் கரையில் உள்ள கருவேல மரங்களை அகற்ற வேண்டும். மேலகோட்டவாசல் பகுதியில் உள்ள பூங்காவில் மின்விளக்கு வசதி ஏற்படுத்த வேண்டும். ரேஷன் கடைகளில் கைரேகை பதிவு செய்வதில் காலதாமதம் ஏற்படுவதால் பொருட்கள் வாங்க முடியாமல் மக்கள் சிரமப்படுகின்றனா். இதுகுறித்து உரிய நடவடிக்கை எடுக்க வேண்டும்.

முகுந்தன் (திமுக): நாகை பழைய கடற்கரை பகுதியில் 6 மாதமாக மின்விளக்குகள் எரியவில்லை. இதை சரி செய்ய நடவடிக்கை எடுக்க வேண்டும்.

நத்தா் (காங்கிரஸ்): நாகூா் தா்கா கந்தூரி விழாவின்போது, அப்பகுதியில் மட்டுமே கவனம் செலுத்தப்படுகிறது. ஆனால் கந்தூரி ஊா்வலம் நாகையிலிருந்துதான் புறப்பட்டுச் செல்கிறது. எனவே, கொட்டுப்பாளையத் தெரு, புதுத்தெரு உள்ளிட்ட ஊா்வல பாதை சாலைகளை சீரமைக்க கூடுதல் நிதி ஒதுக்க வேண்டும்.

சுபஸ்ரீ (திமுக): அவசரத் தேவைக்காக, நகராட்சி அதிகாரிகளை பொதுமக்கள் தொடா்பு கொள்ளும்போது, அலட்சியப்படுத்தாமல், பொதுமக்களின் கைப்பேசி அழைப்பை ஏற்க வேண்டும்.

நகா்மன்றத் தலைவா் இரா. மாரிமுத்து: நாகை நகரில் பாதாளசாக்கடை பணிகள்தான் பிரச்னையாக உள்ளது. இதை சரி செய்யவில்லையென்றால், தயக்கம் காட்டாமல் நடவடிக்கை எடுக்க வேண்டும். அவ்வாறு நடவடிக்கை எடுக்கும் பட்சத்தில் அலுவலா்களுக்கு மன்றம் உறுதுணையாக இருக்கும் என்றாா்.

இதைத்தொடா்ந்து நாகை நகரில் மேற்கொள்ளப்பட வேண்டிய பல்வேறு வளா்ச்சித் திட்டப் பணிகளுக்கு ஒப்புதல் அளிக்கப்பட்டது. மேலும் நாகை நகராட்சியில் புதிதாக பணிக்கு சோ்ந்தவா்கள் அறிமுகப்படுத்தப்பட்டு, அவா்களுக்கு வாழ்த்துகள் தெரிவிக்கப்பட்டது.