வாக்காளர் பட்டியல் சிறப்புத் திருத்தப் பணி அக்.14, 21 ஆகிய தேதிகளிலும் நடைபெறும் என தெரிவிக்கப்பட்டுள்ளது.
இதுகுறித்து காரைக்கால் மாவட்ட தேர்தல் அதிகாரி ஆர்.கேசவன் வெள்ளிக்கிழமை வெளியிட்ட செய்திக் குறிப்பு : வரும் 2019-ஆம் ஆண்டு ஜனவரி 1-ஆம் தேதி அன்று 18 வயது பூர்த்தியாவோர் வாக்காளராகப் பதிவு செய்துகொள்வதற்கான பெயர் சேர்த்தல் பணி காரைக்கால் மாவட்டத்தில் அனைத்து வாக்குச் சாவடிகளிலும் அக்.31-ஆம் தேதி வரை நடைபெறுகிறது. தகுதி பெறும் வாக்காளர்கள் தங்களது பெயரை பதிவு செய்துகொள்ளலாம். மேலும் விவரங்களை சரிபார்த்தல், நீக்குதல், திருத்தம் செய்தல் போன்ற பணிகளையும் செய்துகொள்ளலாம். வரும் 14-ஆம் தேதி மற்றும் 21-ஆம் தேதி ஆகிய ஞாயிற்றுக்கிழமைகளிலும் சிறப்பு முகாம் நடைபெறுகிறது. பொதுமக்கள் இந்த வாய்ப்பை பயன்படுத்திக்கொள்ளுமாறு அதில் கேட்டுக்கொள்ளப்பட்டுள்ளது.