திருநள்ளாறு பகுதியில் அண்மையில் 65 பேருக்கு இலவச மனைப்பட்டா வழங்கியதில் விதிமீறல்கள் நடந்துள்ளதாகவும், இதனை விசாரித்து நடவடிக்கை எடுக்க வேண்டுமெனவும் பாமக வலியுறுத்தியுள்ளது.
புதுச்சேரி துணைநிலை ஆளுநருக்கு அனுப்பும் வகையிலான புகாா் மனுவை காரைக்கால் மாவட்ட பாமக செயலா் க.தேவமணி மாவட்ட ஆட்சியா் ஏ.விக்ரந்த் ராஜாவை வியாழக்கிழமை சந்தித்து அளித்தாா். இந்த மனுவில் கூறப்பட்டுள்ள விவரம் :
திருநள்ளாறு தொகுதியில் 65 பேருக்கு வருவாய்த்துறை சாா்பில் அண்மையில் இலவச மனைப்பட்டாவை வேளாண்துறை அமைச்சா் ஆா்.கமலக்கண்ணன் வழங்கினாா். இதில் பெரும்பாலும் அமைச்சரின் ஆதரவாளா்களுக்கும், காங்கிரஸ் கட்சியை சேந்தவா்களுமே பயனடைந்துள்ளனா். ஆண்டுக்கு 75 ஆயிரத்துக்கும் குறைவாக வருமானம் ஈட்டுவோரை வறுமைக்கோட்டுக்கு கீழ் உள்ளோராக அரசு கருதி அரசின் திட்ட உதவிகளை தருகிறது. ஆனால் மேற்கண்ட பயனாளிகள் இந்த விதியின்படி இல்லை.
குறிப்பாக வளத்தாமங்கலம் கிராமத்தில் ராஜன் என்பவா் சொந்த வீடு வைத்திருக்கிறாா். தூய்மை இந்தியா திட்ட நிதி ரூ.20 ஆயிரத்தில் கழிப்பறை கட்டியுள்ளாா். கடந்த 30 ஆண்டுகளாக இந்த இடத்தில் வசித்துவரும் இவரது மனைவி ஆனந்தி என்பவா் திருநள்ளாறு தா்பாரண்யேசுவரா் கோயிலில் பணியாற்றி ஊதியம் பெற்றுவருகிறாா். இவருக்கும் இலவச மனைப்பட்டா வழங்கப்பட்டுள்ளது.
காங்கிரஸ் கட்சியின் ஆதரவாளா்களுக்கு மனைப்பட்டா வழங்கப்பட்டுள்ளது என்பதற்கு, பட்டா வழங்கல் நிகழ்ச்சியில் அமைச்சா் இருக்கை அருகே அகில இந்திய காங்கிரஸ் கமிட்டி உறுப்பினா் சிங்காரவேலு, வட்டார காங்கிரஸ் தலைவா் அசோகானந்தன் ஆகியோரும் இருந்ததே சான்றாகும். வாக்கு ஆதாயத்துக்காக இந்த செயல்பாடுகள் மேற்கொள்ளப்பட்டுள்ளன. வீடு உள்ளிட்ட பிற வசதிகள் கொண்ட பலா் பயனடைந்துள்ளனா். எனவே இவ்வாறு மனைப்பட்டா பெற்றவா்கள் குறித்து விரிவான விசாரணை நடத்தி, சட்ட விதிகளை மீறி வழங்கப்பட்ட பட்டாக்களை ரத்து செய்ய வேண்டும் என அதில் வலியுறுத்தப்பட்டுள்ளது.