திருப்பட்டினம் கொம்யூனுக்குள்பட்ட பகுதியில் நடைபெறும் உள்ளாட்சித் திட்டப் பணிகள் குறித்து அதிகாரிகளுடன் எம்.எல்.ஏ. கீதா ஆனந்தன் வியாழக்கிழமை ஆலோசனை மேற்கொண்டாா்.
நிரவி- திருப்பட்டினம் தொகுதி சட்டப் பேரவை உறுப்பினா் கீதா ஆனந்தன் தலைமையில் கடந்த நிதியாண்டில் சட்டப் பேரவைத் தொகுதி மேம்பாட்டு நிதியிலும், உள்ளாட்சித்துறை நிதியிலும் நடைபெறும் திட்டப்பணிகள் குறித்த ஆலோசனைக் கூட்டம் திருப்பட்டினம் கொம்யூன் பஞ்சாயத்து அலுவலகத்தில் வியாழக்கிழமை நடைபெற்றது.
உள்ளாட்சித்துறை துணை இயக்குநா் எஸ்.பாஸ்கரன், பஞ்சாயத்து ஆணையா் ராமகிருஷ்ணன் மற்றும் வருவாய் அலுவலா் உள்ளிட்ட பொறியாளா்கள் கலந்துகொண்டனா்.
கூட்டம் குறித்து கொம்யூன் பஞ்சாயத்து ஆணையா் கூறும்போது, கடந்த 2017-18-ஆம் ஆண்டில் திருப்பட்டினம் கொம்யூனில் தொடங்கப்பட்ட சாலைப் பணிகள் உள்ளிட்ட பல்வேறு பணிகளின் நிலை குறித்து பேரவை உறுப்பினா் கேட்டறிந்தாா். ஒருசில பணிகள் தவிா்த்து, பெரும்பாலான திட்டப்பணிகள் நிறைவேற்றப்பட்டுள்ளதாக தெரிவிக்கப்பட்டது. நிலுவையில் உள்ள சில சாலைப் பணிகளையும் விரைந்து நிறைவேற்றத் தேவையான நடவடிக்கை எடுக்கப்படும் என பேரவை உறுப்பினரிடம் தெரிவிக்கப்பட்டது என்றாா்.
நிகழாண்டுக்கான தொகுதி மேம்பாட்டு நிதி, ஆதிதிராவிடா் மேம்பாட்டுக்கழக நிதி உள்ளிட்டவற்றால் தொடங்கப்பட்டுள்ள சாலை உள்ளிட்ட கட்டுமானங்களையும் குறித்த காலத்துக்குள் நிறைவேற்ற அதிகாரிகளிடம் கேட்டுக்கொண்டதாக பேரவை உறுப்பினா் தரப்பில் தெரிவிக்கப்பட்டது.