சுடச்சுட

    

    காரைக்கால் - திருநள்ளாறு இடையே 6 கி.மீ.  தூரத்தில் சாலைக்கும்  வாய்க்காலுக்கும் இடையே தடுப்பு அமைக்க வலியுறுத்தப்பட்டுள்ளது.
    காரைக்கால் சந்தைத் திடல் அருகே வாஞ்சியாற்றில் கலக்கும் வகையில் காரைக்கால் - திருநள்ளாறு இடையே 6 கி.மீ. நீளத்தில் சாலையோரத்தில் வாய்க்கால் உள்ளது. காவிரி நீர் வரும் காலம், மழைக் காலத்தில் இந்த வாய்க்காலில் தண்ணீர் செல்லும். பிற காலங்களில் திருநள்ளாறு நளன் தீர்த்தக் குளத்திலிருந்து அவ்வப்போது மோட்டார் மூலம் வெளியேற்றப்படும் தண்ணீர் இதன் வழியே வாஞ்சியாற்றில் கலக்கும் வகையில் செல்லும்.
    இந்த தண்ணீரை பச்சூர், பூமங்கலம் உள்ளிட்ட வாய்க்காலையொட்டி வேளாண் நிலங்களுக்கு, விவசாயிகள் மோட்டார் மூலம் பயன்படுத்திக்கொள்வர். சாலையிலிருந்து இந்த வாய்க்கால் சற்று ஆழமான பகுதியாகவே உள்ளது. எனவே, பாதுகாப்பு கருதி சாலைக்கும் - வாய்க்காலுக்கும் இடையே தடுப்புச் சுவர் அல்லது இரும்புத் தடுப்பு அமைக்க வேண்டும் என பல்வேறு தரப்பினர் நீண்ட காலமாக மாவட்ட நிர்வாகத்தை வலியுறுத்தி வருகின்றனர். காரைக்காலில் இருந்து திருநள்ளாறு மற்றும் கும்பகோணம் செல்லும் பேருந்துகள் உள்ளிட்ட வாகனப் போக்குவரத்து இந்த மார்க்கத்தில் அதிகம்.  6 கி.மீ.  தூரத்துக்கிடையே 2 மதுக்கடைகள் உள்ளன. போக்குவரத்து வாகனங்கள் பலவும் மிகுதியான வேகத்தில் பயணிப்பதால், ஒன்றுக்கொன்று மோதி வாய்க்காலில் கவிழும் ஆபத்து உள்ளது. இரண்டு இருசக்கர வாகனங்கள் மோதிக்கொண்டதில் வாய்க்காலில் விழுந்து உயிரிழப்பும் கடந்த சில ஆண்டுகளுக்கு முன்பு நேரிட்டதாகக் கூறும் சமூக ஆர்வலர்கள், இரவில் போதிய மின் வெளிச்சமின்மை, அதிவேக வாகனப் பயணம் போன்றவற்றாலும், மதுக்கடைக்கு சென்றுவிட்டு செல்வோராலும் இந்த பகுதியில் தினமும் விபத்து ஏற்படுகிறது.இந்த சாலையில் முதியவர்கள், பெண்கள், குழந்தைகளை வைத்துக்கொண்டு இருசக்கர வாகனத்தில் செல்வோர் மிகுந்த அச்சத்துடன் பயணிக்கவேண்டியுள்ளது.  எனவே, இந்த பகுதியிலும் உரிய தடுப்பு அமைக்க மாவட்ட நிர்வாகம் நடவடிக்கை எடுக்கவேண்டும் என பொதுமக்கள் தரப்பில் வலியுறுத்தப்படுகிறது.
     

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai