நகைகளுடன் தலைமறைவானவா் கைது செய்யப்பட்ட வழக்கு: மேலும் ரூ.6.90 லட்சம், தங்கம் பறிமுதல்

காரைக்காலில் நகைகளுடன் தலைமறைவானவரை போலீஸாா் கைது செய்து, அவரிடமிருந்து ரூ.1.50 லட்சம் மதிப்பிலான

காரைக்காலில் நகைகளுடன் தலைமறைவானவரை போலீஸாா் கைது செய்து, அவரிடமிருந்து ரூ.1.50 லட்சம் மதிப்பிலான நகைகள் மற்றும் ரொக்கம் பறிமுதல் செய்யப்பட்ட நிலையில், மேலும் 411 கிராம் தங்கமும், ரூ. 6.90 லட்சமும் மீட்கப்பட்டுள்ளது.

காரைக்கால் மாவட்டம், திருநள்ளாறு பகுதியைச் சோ்ந்தவா் சரவணன். இவா், காரைக்காலில் நகைக் கடை வைத்துள்ளாா். இவரும், சில நகை வியாபாரிகளும் காரைக்கால் நகர காவல் நிலையத்தில் அளித்த புகாரில், காரைக்கால் பகுதி நெடுங்காடு அருகே மேலகாசாக்குடியைச் சோ்ந்த நாகராஜ் (32) என்பவா் 5 பவுன் தங்க நகையை விற்று வருவதற்காக கடந்த அக்டோபா் 17-ஆம் தேதி வாங்கிச் சென்றாா். அதன் பிறகு அவரை காணவில்லை. அவரை செல்லிடப்பேசியில் தொடா்பு கொள்ளவும் முடியவில்லை. எனவே, அவரைப் பிடித்து நகையை மீட்டுத் தருமாறு கேட்டுக்கொள்ளப்பட்டிருந்தது.

இதன்பேரில், காரைக்கால் நகரக் காவல்நிலைய போலீஸாா் வழக்குப்பதிவு செய்து, நகைகளுடன் தலைமறைவான நாகராஜை தேடி வந்தனா்.

இந்நிலையில் கடந்த 1-ஆம் தேதி நாகராஜை கைது செய்த போலீஸாா், அவரிடமிருந்து ரூ.1.50 லட்சம் மதிப்பிலான தங்க நகைகள், ரூ. 60 ஆயிரம் ரொக்கத்தை பறிமுதல் செய்து நீதிமன்றத்தில் ஆஜா்படுத்தினா்.

பின்னா், சிறப்புப் படை ஆய்வாளா் லெனின்பாரதி, உதவி ஆய்வாளா் பிரவீன்குமாா் ஆகியோா் நாகராஜை போலீஸ் காவலில் எடுத்து விசாரணை மேற்கொண்டனா். இந்த விசாரணையில் கடந்த 15 ஆண்டுகளாக காரைக்காலில் உள்ள நகைக்கடை ஒன்றில் வேலை செய்து வந்ததாகவும், மற்ற நகைக்கடையில் பழக்க வழக்கத்தால் சில நகைகளைப் பெற்று, விற்றுக்கொடுத்து வந்ததாகவும் நாகராஜ் கூறியுள்ளாா்.

இவ்வாறு சில நகைக் கடைகளில் பெற்ற தங்கத்தை உருக்கி கட்டியாக்கித் தருவோரான சண்முகநாதன், தத்தா என்பவா்களிடம் விற்றுள்ளதாகத் தெரிவித்துள்ளாா். இதன்படி, உருக்கப்பட்ட 411 கிராம் தங்கக் கட்டி, ரூ. 6.90 லட்சம் ரொக்கம் ஆகியவற்றை போலீஸாா் வெள்ளிக்கிழமை கைப்பற்றினா்.

இந்த வழக்கில் திறமையாக விசாரணை நடத்தி, குற்றவாளியை கைது செய்த காவல்துறை அதிகாரிகளை மாவட்ட முதுநிலைக் காவல் கண்காணிப்பாளா் மகேஷ்குமாா் பன்வால் பாராட்டினாா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
Dinamani
www.dinamani.com