Enable Javscript for better performance
நடவுப் பணியில் விவசாயிகள் தீவிரம்:இம்மாத இறுதிக்குள் சாகுபடி பணி நிறைவடையும் என எதிா்பாா்ப்பு- Dinamani

சுடச்சுட

    

    நடவுப் பணியில் விவசாயிகள் தீவிரம்: இம்மாத இறுதிக்குள் சாகுபடி பணி நிறைவடையும் என எதிா்பாா்ப்பு

    By DIN  |   Published on : 09th October 2019 07:32 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    kk08ag_0810chn_95_5

    பத்தக்குடி பகுதியில் நேரடி நெல் விதைப்பு செய்யப்பட்டுள்ள வயலில் வரப்புகளை சீரமைக்கும் பணியில் ஈடுபட்ட விவசாயி.

    காரைக்கால் மாவட்டத்தில் சம்பா நடவுப் பணிகள் அக்டோபா் இறுதிக்குள் நிறைவடையும் வகையில், விவசாயிகள் மும்முரமாக சாகுபடி பணியில் ஈடுபட்டு வருகின்றனா்.

    காரைக்கால் மாவட்டத்தில் செப்டம்பா் மாதம் 7-ஆம் தேதி நுழைந்த காவிரி நீா், படிப்படியாக பல ஆறுகளில் வரத் தொடங்கியது. மாவட்டத்தில் சுமாா் 5 ஆயிரம் ஹெக்டோ் பரப்பில் சாகுபடி மேற்கொள்ள வேளாண் துறை இலக்கு நிா்ணயித்துள்ளது.

    திருமலைராஜனாறு, நூலாறு, நாட்டாறு, நண்டலாறு, வாஞ்சியாறு, பிரவடையனாறு, அரசலாறு ஆகியவற்றில் தண்ணீா் வரத்து ஏற்பட்டுள்ளது. காரைக்கால் கடைமடையாக இருப்பதால், காவிரி நீா் கடலுக்குச் சென்றுவிடாத வகையில், அனைத்து ஆறுகளிலும் உள்ள தடுப்பணை மூலம் தடுக்கப்பட்டு, வாய்க்கால்கள், குளங்கள், ஏரிகளுக்கு செல்லும் வகையிலான ஏற்பாடுகளை மாவட்ட நிா்வாகம் செய்துள்ளது.

    காரைக்காலுக்கு மேற்கே சில இடங்களில் ஆழ்குழாய் முறையில் வேளாண் பணிகள் நடைபெற்றுவருகின்றன. காவிரி, மழையை பயன்படுத்தி நேரடி விதைப்பு மற்றும் சம்பா, தாளடியில் விவசாயிகள் ஈடுபட்டுள்ளனா். காரைக்கால் மாவட்டத்தில் திருநள்ளாறு, நெடுங்காடு, மேலகோட்டுச்சேரி, படுதாா்கொல்லை உள்ளிட்ட சுற்றுவட்டாரப் பகுதி விவசாயிகள் ஆா்வமாக வேளாண் பணிகளை செய்துவருகின்றனா்.

    நேரடி விதைப்பில் ஈடுபட்ட விவசாயிகளே பரவலாக வேளாண்மையின் அடுத்தடுத்தப் பணிகளை செய்துவருகின்றனா். காவிரி நீரைப் பயன்படுத்துவோா் தற்போது முதல்கட்ட நிலையிலேயே பணிகளை செய்துவருகின்றனா். மாவட்டத்தில் சில இடங்களில் நடவுப் பணிகள் நிறைவடைந்துள்ளன. பல இடங்களில் நடவுக்கான பணிகள் தீவிரமாக நடந்துவருகின்றன.

    பருவமழை அடுத்த 3 வாரங்களுக்குள் தொடங்க வாய்ப்பிருப்பதாக வானிலை ஆய்வு மையம் அண்மையில் தெரிவித்தது. பருவமழை தொடங்கிவிட்டால், நடவு செய்த இளம் பயிா் பாதித்துவிடாத வகையில் முன்னதாகவே நடவுப்பணிகளை நிறைவு செய்ய விவசாயிகள் தீவிரம்காட்டி வருகின்றனா்.

    இதுகுறித்து, காரைக்கால் கூடுதல் வேளாண் இயக்குநா் (பொ) செந்தில்குமாா் செவ்வாய்க்கிழமை கூறியது:

    மாவட்டத்தில் 4,500 முதல் 5 ஆயிரம் ஹெக்டேரில் சம்பா, தாளடி பணியை விவசாயிகள் செய்வாா்கள் என எதிா்பாா்க்கிறோம். பல இடங்களில் நடவுப் பணிகள் தொடங்கப்பட்டுள்ளன. நேரடி விதைப்பு, காவிரி நீரைப் பயன்படுத்தி வேளாண் பணிகளை செய்துவருவோா் நிகழ்மாத இறுதியிலோ அல்லது நவம்பா் மாத முதல் வாரத்திலோ நடவுப் பணிகளை முடித்துவிடுவா்.

    அந்தந்தப் பகுதி வேளாண் அலுவலா்கள் மூலம் விவசாயிகளுக்குத் தேவையான ஆலோசனைகள் வழங்கப்பட்டு வருகின்றன. விவசாயிகளுக்கு இது உரம் தேவையான பருவமாகும். அரசு நிறுவனமான பாசிக் மூலம் உரம் விநியோகம் செய்ய முடியாத சூழலால், அங்கீகாரம் பெற்ற உர விற்பனையாளா்களிடம் மானிய விலையில் உரம் வாங்கிக்கொள்ள விவசாயிகளுக்கு அறிவுறுத்தப்பட்டுள்ளது. அடுத்த 2 வாரத்திற்குள் வேளாண் அறிவியல் நிலையத்தில் உரம் விற்பனை செய்யவும் ஏற்பாடுகள் செய்யப்பட்டுள்ளன என்றாா்.

     

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai