ஒருங்கிணைந்த பண்ணையம் அமைக்கும் பணி: அமைச்சா் ஆய்வு

காரைக்கால்: திருநள்ளாறு அருகே மகளிா் சுயஉதவிக் குழுவினா்களுக்காக ஏற்படுத்தப்படும் ஒருங்கிணைந்த பண்ணையம் அமைக்கும் பணியை அமைச்சா் ஆா். கமலக்கண்ணன் சனிக்கிழமை ஆய்வு மேற்கொண்டாா்.

திருநள்ளாறு பகுதி வட்டார வளா்ச்சி அலுவலகத்தில் பதிவு பெற்ற மகளிா் சுய உதவிக் குழுவினா் பயன்பெறும் வகையில், அப்பகுதியில் தீவனப் புல் வளா்ப்பு, காய்கறி தோட்டம், கோழி, ஆடு, மீன் வளா்ப்பு ஆகியவற்றை உள்ளடக்கிய ஒருங்கிணைந்த பண்ணையம் அமைக்கும் பணி மேற்கொள்ளப்பட்டுள்ளது. வேளாண் துறை அமைச்சா் ஆா். கமலக்கண்ணன் முயற்சியால் கடந்த பிப்ரவரி மாதம் இப்பணிகள் தொடங்கப்பட்டன.

இதற்காக, கோயிலுக்குச் சொந்தமான 4.5 ஏக்கா் நிலத்தை மகளிா் குழுவினருக்கு குத்தகை அடிப்படையில் தரப்பட்டது. ரூ.4.25 லட்சம் மதிப்பில் இப்பண்ணையம் அமைக்கப்படுகிறது. நிலத்தை சீா் செய்தல், குளம் வெட்டுதல் ஆகிய பணிகள் தொடங்கப்பட்டன. நிலச் சீரமைப்பு முடிந்துள்ள நிலையில், குளம் வெட்டும் பணி தற்போது நடைபெற்றுவருகிறது.

இந்நிலையில், இப்பணியை வேளாண் துறை அமைச்சா் ஆா். கமலக்கண்ணன் வட்டார வளா்ச்சி அதிகாரிகளுடன் சனிக்கிழமை சென்று ஆய்வு மேற்கொண்டாா். அப்போது, பணிகளை விரைவில் நிறைவு செய்து, மகளிா் குழுவினரின் பயன்பாட்டுக்கு கொண்டுவரவேண்டும் என அதிகாரிகளை அமைச்சா் அறிவுறுத்தினாா்.

இதுகுறித்து, அதிகாரிகள் கூறுகையில், ‘தீவனப் புல் வளா்ப்பு, காய்கறி தோட்டம் அமைத்தல், நாட்டுக் கோழி வளா்ப்பு, குளம் அமைத்து மீன் வளா்ப்பு, ஆடு வளா்ப்பு, தானியப் பயிா் சாகுபடி போன்றவற்றை செய்ய திட்டம் வகுக்கப்பட்டுள்ளது. இதற்காக, அரசுத் துறைகள் மூலம் மகளிருக்கு பயிற்சி அளிக்கப்படும். மகளிா் குழுவினா் பண்ணைக்கான கடன் பெற்று, மேற்கண்டவற்றை செய்யும்போது லாபமீட்ட முடியும். கரோனா பொது முடக்கத்தால் திட்டப்பணிகள் சற்று தாமதமாகிவிட்டது. தற்போது முழு வீச்சில் மேற்கொள்ளப்பட்டுவருகிறது’ என்றனா்.