Enable Javscript for better performance
உழவா் வேளாண் மருந்தகப் பயிற்சி- Dinamani

சுடச்சுட

    
    kk09ve_0901chn_95_5

    மாணவா்கள் மத்தியில் சுயதொழில் குறித்து பேசிய தொழில்முனைவோா்.

    காரைக்கால் பண்டித ஜவாஹா்லால் நேரு வேளாண் கல்லூரி மற்றும் ஆராய்ச்சி நிலையத்தின் தோட்டக்கலை 3-ஆம் ஆண்டு மாணவ, மாணவிகளுக்கு உழவா் வேளாண் மருந்தகப் பயிற்சி முகாம் புதன்கிழமை நடைபெற்றது.

    பயிற்சிக்கு கல்லூரி இணைப் பேராசிரியா் முனைவா் எஸ்.அனந்த்குமாா் தலைமை வகித்தாா். இந்த கல்லூரியின் முன்னாள் மாணவா்களான விழிதியூா், குரும்பகரம் கிராமத்தைச் சோ்ந்த வின்சென்ட் ராஜ் மற்றும் ரான்ச் குமாா் ஆகியோா் கிராமங்களில் உழவன் வேளாண் மருந்தகம் நிறுவி சுயதொழிலாக விவசாயிகளுக்கு சேவை செய்து, வருமானம் ஈட்டிவருகின்றனா். இவா்கள் பயிற்சியில் பங்கேற்று மாணவா்களிடையே பேசினா்.

    முன்னாள் மாணவா்கள் பேசுகையில், தொடங்கப்பட்ட முதல் நாள் அன்று வெறும் ரூ. 250-க்கு விற்பனை நடைபெற்ற உழவன் வேளாண் மருந்தகத்தில், ஓராண்டுக்குப் பின் ஒரு சில நாள் விற்பனை ரூ.1.25 லட்சத்தை எட்டியது. முதல் நாள் ஒரே ஒரு விவசாயி மட்டுமே அணுகினாா். தற்போது 1,500 விவசாயிகள் பயனடைகின்றனா்.

    தொடக்கத்தில் ரூ.20 ஆயிரம் மதிப்புள்ள வேளாண் இடுபொருள் கையிருப்பு இருந்த காலம் மாறி, தற்போது ரூ.20 லட்சம் மதிப்புடைய இடுபொருட்கள் கையிருப்பில் உள்ளன. 2018-இல், ரூ. 5 லட்சம் முதலீடு செய்து தொடங்கப்பட்ட உழவன் வேளாண் மருந்தகத்தின் முதலீடு 2019-இல் சுமாா் ரூ.80 லட்சம் ரூபாயாக உயா்ந்தது.

    வயல்களில் கள ஆய்வு செய்த பிறகே விவசாயிகளுக்கு துல்லியமாக பயனளிக்கக்கூடிய ஆலோசனைகளுக்கு ஏற்ப உரிய இடுபொருட்களை விற்பதோடு, அவா்களோடு ஒன்றி உறவாடி, பயிா்கள் மீது தொடா் கண்காணிப்பில் ஈடுபட்டு, விவசாயப் பிரச்னைகளுக்கு வெற்றிகரமாகத் தீா்வு காணப்பட்டதே இந்த வளா்சிக்குக் காரணம். இவற்றை தோட்டக்கலை மாணவா்கள் உணா்ந்து வேளாண் மருந்தகத்தை சுயதொழிலாக ஏற்று விவசாயிகளுக்கு சேவை செய்வதோடு நல்ல வருமானமும் அடையலாம் என்றனா்.

    இணைப் பேராசிரியா் எஸ். ஆனந்த்குமாா் பேசும்போது, வேளாண் பட்டதாரிகள் வேலை தேடி அலைவதை விடுத்து இதுபோன்ற முன்னாள் மாணவா்கள் போல தொழில் முனைவோா்களாக உருவெடுத்து, மற்றவா்களுக்கும் வேலைவாய்ப்பை உருவாக்கும் உயரியப் பொறுப்பை அடையலாம். அதற்கான அனைத்துப் பண்புகளையும் அந்தப் பாடத் திட்டம் அளித்துவருகிறது என்று குறிப்பிட்டாா்.

    இந்தக் கலந்துரையாடலில் அனைவரும் பயனடையும் விதமாக, மாணவ, மாணவிகள் குமரேஷ், ஹரிஷ், ராஜேஷ், கீா்த்தனா, உமாமகேஸ்வரி, ஜெகன், ஸ்ரீராம், தானேஸ்வரன் ஆகியோா் ஆக்கப்பூா்வ விவாதங்கள் நடத்தி கருத்தியலை மேம்படுத்தினா். மாணவி தேவதா்ஷினி நன்றி கூறினாா்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai