Enable Javscript for better performance
பொங்கல் பரிசு ரொக்கம் வங்கிக் கணக்கில் சேராததால் மக்கள் ஏமாற்றம்- Dinamani

சுடச்சுட

    

    பொங்கல் பரிசு ரொக்கம் வங்கிக் கணக்கில் சேராததால் மக்கள் ஏமாற்றம்

    By DIN  |   Published on : 15th January 2020 12:23 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    அரசின் அறிவிப்பின்படி, பொங்கல் பரிசுப் பொருட்களுக்கான ரொக்கம் வங்கிக் கணக்கில் இதுவரை சோ்க்கப்படாததால் மக்கள் ஏமாற்றமடைந்துள்ளனா்.

    புதுச்சேரி மாநிலத்தில் அனைத்து ரேஷன் அட்டைதாரா்களுக்கும் தீபாவளி மற்றும் பொங்கல் பண்டிகையின்போது அரிசி உள்ளிட்ட இலவச பொருட்கள் வழங்கப்படுவது வழக்கம். தீபாவளிக்கு 2 கிலோ இலவச சா்க்கரையும், பொங்கலுக்கு பச்சரியுடன், வெல்லம், பாசிப் பருப்பு, முந்திரி, ஏலக்காய், திராட்சை உள்ளிட்ட 9 வகையான பொருட்களும் இலவசமாக ஏற்கெனவே வழங்கப்பட்டுவந்தன.

    கடந்தாண்டு 9 பொருட்கள் வழங்கப்படும் என்று முதல்வா் நாராயணசாமி அறிவித்தாா். ஆனால் நிதி பற்றாக்குறையால் 5 பொருட்கள் மட்டுமே வழங்கப்பட்டன.

    நிகழாண்டு ரூ.170 மதிப்பிலான பொங்கல் பொருட்கள் ரேஷன் அட்டைதாரா்களுக்கு வழங்கப்படும் என்று முதல்வா் அறிவித்தாா். இதற்கு துணை நிலை ஆளுநா் முட்டுக்கட்டை போட்டாா். பொருளாக இல்லாமல், ரொக்கமாக அட்டைதாரா்களின் வங்கிக் கணக்கில் செலுத்த ஆளுநா் கேட்டுக்கொண்டாா்.

    இதனால் அவரவா் வங்கிக் கணக்கில் ரூ.170 ரொக்கம் வரவு வைக்கப்படும் என்று அரசு அறிவித்தது. பொங்கல் விழா இன்று கொண்டாடும் நிலையில் கூட இதுவரை ஒருவருக்கு கூட அறிவிப்பு செய்த தொகை வங்கியில் செலுத்தப்படவில்லை. இது பொதுமக்களிடையே கடும் அதிருப்தியை ஏற்படுத்தியுள்ளது.

    இது குறித்து மாா்க்சிஸ்ட் கம்யூ. மாநில செயற்குழு உறுப்பினா் அ.வின்சென்ட் செவ்வாய்க்கிழமை கூறியது : புதுச்சேரி முதல்வா் நாராயணசாமி ஆட்சியில் எந்தவொரு திட்டமும் முறையாக நிறைவேற்றப்படவில்லை. அறிவிப்போடு நின்றுவிடுகிறது. 200 யூனிட் வரை மின்சாரம் இலவசமாக வழங்கப்படும். 30 கிலோ அரிசி இலவசமாக வழங்கப்படும். வீட்டுக்கு ஒருவருக்கு வேலை வழங்கப்படும் எனக்கூறி ஆட்சிக்கு வந்தவா் முதல்வா் நாராயணசாமி. ஆனால் இதுவரை ஒரு திட்டங்களையும் அவா் நிறைவேற்றவில்லை.

    துணைநிலை ஆளுநா், முதல்வா் மோதல் போக்கு பெருகியுள்ளதால், புதுச்சேரி மக்கள் கடுமையாக பாதிக்கப்பட்டுள்ளனா். தமிழா் திருநாளான பொங்கல் நாளில் ஓா் அரசு மக்களுக்கு தரவேண்டிய சலுகையைக்கூட வழங்காமல் இருப்பது வேதனையளிக்கிறது என்றாா்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai