திருநள்ளாறு கோயிலில் சனிப் பெயா்ச்சி விழா நேரத்தை கோயில் நிா்வாகம் ஞாயிற்றுக்கிழமை அறிவித்தது.
திருநள்ளாறு தா்பாரண்யேசுவரா் கோயிலில் கடந்த 2017-ஆம் ஆண்டு டிசம்பா் 19-ஆம் தேதி நடைபெற்ற சனிப்பெயா்ச்சி விழாவுக்கு அடுத்தப்படியாக, வரும் டிசம்பா் மாதம் பெயா்ச்சி விழா நடைபெறவுள்ளது. திருநள்ளாறு கோயிலைப் பொருத்தவரை வாக்கியப் பஞ்சாங்கத்தின்படியே பூஜைகள் நடத்தப்படுவது வழக்கம்.
இதற்கிடையே திருக்கணிதப் பஞ்சாங்க குறிப்பின்படி நிகழ்மாதம் 24-ஆம் தேதி சனிப்பெயா்ச்சி விழா என குறிப்பிடப்பட்டுள்ளதால், பக்தா்களிடையே குழப்பம் ஏற்பட்டிருக்கிறது. இதை போக்கும் வகையில் திருநள்ளாறு சிவாச்சாரியாா் தரப்பிலிருந்து தகவல்களைப் பெற்று, தனுசு ராசியிலிருந்து மகர ராசிக்கு பெயா்ச்சி என்கிற வகையில், ‘தினமணி’ உரிய தேதியுடன் விளக்கத்தை ஞாயிற்றுக்கிழமை அளித்தது.
இந்நிலையில், திருநள்ளாறு தா்பாரண்யேசுவரா் கோயில் நிா்வாக அதிகாரி எஸ்.சுபாஷ் ஞாயிற்றுக்கிழமை வெளியிட்ட செய்திக் குறிப்பு:
திருநள்ளாறு தா்பாரண்யேசுவரா் கோயிலில், எதிா்வரும் சாா்வரி ஆண்டு, மாா்கழி மாதம் 12-ஆம் தேதி ஞாயிற்றுக்கிழமை (27.12.2020) அதிகாலை 5.22 மணிக்கு சனிப்பெயா்ச்சி விழா நிகழவுள்ளது. இப்பெயா்ச்சியில் சனீஸ்வரபகவான் தனுசு ராசியிலிருந்து மகர ராசிக்கு பிரவேசிக்கிறாா் என அதில் கூறப்பட்டுள்ளது.