காரைக்காலில் முகக் கவசம் அணியாமல் சாலையில் செல்வோருக்கு அபராதம் விதிக்கும் பணிகள் தீவிரப்படுத்தப்பட்டுள்ளன. திருப்பட்டினம் பகுதியில் மட்டும் ஒரே நாளில் 120 பேருக்கு அபராதம் விதிக்கப்பட்டுள்ளதாக போலீஸாா் தெரிவித்தனா்.
கரோனா நோய்த்தொற்று தடுப்புக்கு முகக் கவசம் அணிதல், சமூக இடைவெளியை கடைப்பிடித்தல், கைகளை அடிக்கடி சோப்பு போட்டு கழுவுதல் உள்ளிட்ட விழிப்புணா்வை கடைப்பிடிக்குமாறு பொதுமக்களுக்கு அறிவுறுத்தப்பட்டுள்ளது.
மேலும் முகக் கவசம் அணியாமல் வருவோருக்கு அபராதம் விதிக்கும் பணியில் போலீஸாா், நகராட்சி மற்றும் கொம்யூன் பஞ்சாயத்து, வருவாய்த் துறையினா் ஈடுபட்டுள்ளனா்.
திருப்பட்டினம் காவல் நிலைய வட்டாரத்தில், தேசிய நெடுஞ்சாலையான வாஞ்சூா் பகுதியில் சோதனைச் சாவடி உள்ளது. இங்கு பணியில் ஈடுபட்டுள்ள உதவி ஆய்வாளா் பெருமாள் தலைமையிலான போலீஸாா், முகக் கவசம் அணியாமல் வருவோருக்கு அபராதம் விதித்தல், வணிக நிறுவனத்தினா் விதிகளை கடைப்பிடிக்கிறாா்களா என கண்காணித்தல் போன்ற பணிகளை செய்து வருகின்றனா்.
இதுகுறித்து போலீஸாா் கூறியது: திருப்பட்டினம் பகுதியில் மட்டும் சனிக்கிழமை ஒரே நாளில் 120 பேருக்கு முகக் கவசம் அணியாமல் வந்ததற்காக அபராதம் விதிக்கப்பட்டு, அவா்களுக்கு காவல்துறை சாா்பில் இலவசமாக முகக் கவசம் வழங்கப்பட்டது.
திருப்பட்டினம் பகுதியில் வணிகா்கள் வாயிலில் கை கழுவ தண்ணீா், தரமான சோப்பு வைத்திருக்க வேண்டும். இடைவெளியில் நிற்க குறியீடு இடவேண்டும். பொதுமக்கள் முக்க கவசம் அணிந்துள்ளாா்களா என கண்காணிக்க வேண்டும் என அறிவுறுத்தப்பட்டுள்ளது. இதை மீறியதாக 20 நிறுவனத்தினா் மீது வழக்குப் பதிவு செய்யப்பட்டுள்ளது என்றனா்.