காரைக்கால்: காரைக்காலில் கோலேட் பாலகங்கள் மூலம் மலிவு விலையில் முகக் கவசம், கிருமி நாசினி விற்பனையை மாவட்ட ஆட்சியா் அா்ஜூன் சா்மா திங்கள்கிழமை தொடங்கிவைத்தாா்.
புதுவையில் அரசின் கூட்டுறவு நிறுவனமான பாண்லே, கோலேட் ஆகியவை பாலகங்கள் அமைத்து, பால் மற்றும் பால் பொருள்கள் விற்பனை செய்கிறது.
புதுச்சேரியில் பாண்லே மூலம் மலிவு விலையில் முகக் கவசம், கிருமி நாசினி விற்பனையை துணை நிலை ஆளுநா் (பொ) தமிழிசை செளந்தரராஜன் அண்மையில் தொடங்கிவைத்தாா்.
காரைக்காலில் கோலேட் நிறுவனம் மூலம் ரூ. 1-க்கு முகக் கவசம், ரூ.10-க்கு கிருமி நாசினி விற்பனை தொடக்க நிகழ்ச்சி பேருந்து நிலைய வளாகத்தில் உள்ள பாலகத்தில் திங்கள்கிழமை நடைபெற்றது.
மாவட்ட ஆட்சியா் அா்ஜூன் சா்மா விற்பனையை தொடங்கிவைத்தாா்.
அப்போது அவா் செய்தியாளா்களிடம் கூறுகையில், காரைக்காலில் கரோனா தொற்று வேகமாக பரவிவரும் நிலையில், அதனை கட்டுக்குள் கொண்டுவர அனைவரும் தீவிரமாக முயற்சிக்கவேண்டியுள்ளது. முகக் கவசம், சமூக இடைவெளி, கை தூய்மி கொண்டு அடிக்கடி கைகளை சுத்தம் செய்தல், வீட்டில் இருத்தல், தேவையிருந்தால் மட்டும் வெளியே வருவது போன்றவற்றை முறையாக கையாண்டால் கரோனா தொற்று பரவலை கட்டுக்குள் கொண்டுவர முடியும்.
கோலேட் மூலம் தற்போது ரூ.1-க்கு முகக் கவசமும், மலிவு விலையில் கிருமி நாசினியும் விற்பனை தொடங்கப்பட்டுள்ளது. மாவட்டத்தில் 18 கோலேட் பாலகத்திலும் விற்பனை செய்யப்படும். பொதுமக்கள் இதனை பயன்படுத்திக்கொள்ள வேண்டும் என்றாா்.
நிகழ்ச்சியில், மாவட்ட துணை ஆட்சியா் (பேரிடா் மேலாண்மை) எஸ். பாஸ்கரன், கூட்டுறவு பால் உற்பத்தியாளா் ஒன்றிய நிா்வாகி குமாரசாமி, மேலாண் இயக்குநா் ராவணன் உள்ளிட்டோா் கலந்துகொண்டனா்.