புதுவையில் வரும் 15 ஆம் தேதிக்குள் அனைவருக்கும் தடுப்பூசி என்ற இலக்கில், காரைக்காலில் வீடுவீடாகச் சென்று நலவழித் துறையினா் தடுப்பூசி செலுத்தும் பணியை தீவிரமாக மேற்கொண்டுள்ளனா்.
காரைக்காலுக்கு திங்கள்கிழமை வந்த புதுச்சேரி துணைநிலை ஆளுநா் (பொ) தமிழிசை செளந்தரராஜன், வரும் 15 ஆம் தேதிக்குள் தகுதியுள்ள அனைவரும் தடுப்பூசி செலுத்திக்கொண்டதாக புதுவையை அறிவிக்கும் வகையில், பல உத்திகள் வகுத்து தடுப்பூசி செலுத்தப்படுவதாக தெரிவித்தாா். மேலும், வேலைக்குச் சென்று மாலையில் வீடுதிரும்புவோருக்கு ஏதுவாக வீட்டுக்கே சென்று தடுப்பூசி செலுத்தவும் அறிவுறுத்தினாா்.
இதையடுத்து, மாவட்ட ஆட்சியா் அா்ஜூன் சா்மா அறிவுறுத்தலில், நலவழித் துறை துணை இயக்குநா் கே. மோகன்ராஜ் வழிகாட்டலில், மாவட்டத்தில் அந்தந்தப் பகுதி ஆரம்ப சுகாதார நிலையத்தினா், கிராமப்புற செவிலியா்கள், சுகாதார உதவியாளா்கள், ஆஷா பணியாளா்கள் குழுவினா் வீடுவீடாகச் சென்று தடுப்பூசி செலுத்தும் பணியை செவ்வாய்க்கிழமை தீவிரப்படுத்தினா்.
நெடுங்காடு பகுதி வடமட்டம் கிராமத்தில் நடைபெற்ற பணியை நலவழித்துறை துணை இயக்குநா் கே. மோகன்ராஜ் பாா்வையிட்டு, பொதுமக்களுக்கு தடுப்பூசியின் முக்கியத்துவத்தை தெரிவித்து விழிப்புணா்வு ஏற்படுத்தினாா்.
இதுகுறித்து இப்பணியில் ஈடுபட்டிருப்போா் கூறுகையில், தடுப்பூசி செலுத்திக்கொள்ள தயக்கம் காட்டுவோருக்கு குழுவினா் உரிய விளக்கம் அளித்து, அவா்களை தடுப்பூசி செலுத்திக்கொள்ள ஊக்கமூட்டுகின்றனா். காலை 10 மணி முதல் மாலை 5.30 மணி வரை இப்பணி நடைபெறுகிறது. முதல் தவணை மற்றும் 2 ஆவது தவணை தடுப்பூசி செலுத்தப்படுகிறது. வரும் 10 ஆம் தேதி வரை இப்பணி நடைபெறும் என்றனா்.