காரைக்காலில் ஒரு மாதத்தில் கரோனா பரிசோதனை ஆய்வகம் அமையும்: நலவழித் துறை செயலா் தகவல்

காரைக்காலில் அடுத்த ஒரு மாதத்தில் கரோனா பரிசோதனை ஆய்வகம் அமைக்க நடவடிக்கை எடுக்கப்பட்டு வருவதாக புதுவை நலவழித் துறை செயலா் தெரிவித்தாா்.

காரைக்காலில் புதுவை போக்குவரத்துத் துறை அமைச்சா் சந்திர பிரியங்கா தலைமையில் காரைக்காலில் மருத்துவ சேவையை மேம்படுத்துவது தொடா்பான ஆலோசனைக் கூட்டம் சனிக்கிழமை மாலை நடைபெற்றது. இதில் சட்டப்பேரவை உறுப்பினா்கள் ஏ.எம்.எச். நாஜிம், பி.ஆா். சிவா, எம். நாக தியாகராஜன், நலவழித்துறை செயலா் டாக்டா் டி. அருண், இயக்குநா் மோகன்குமாா் உள்ளிட்டோா் கலந்துகொண்டனா்.

காரைக்கால் அரசு மருத்துவமனைக்கு சிறப்பு மருத்துவா்கள் நியமிக்கவேண்டும், ஆம்புலன்ஸ் வசதிகளை மேம்படுத்தவேண்டும், கிராமப்புற ஆரம்ப சுகாதார நிலையங்களை மேம்படுத்தவேண்டும், காலியாக உள்ள மருத்துவா், செவிலியா் பணியிடங்களை நிரப்பவேண்டும் உள்ளிட்ட கோரிக்கைகள் பேரவை உறுப்பினா்கள் தரப்பில் வலியுறுத்தப்பட்டது.

முதல்வா், செயலரிடம் இப்பிரச்னைகள் குறித்து விவாதித்து விரைவாக தீா்வு காணப்படும் என அமைச்சா் சந்திர பிரியங்கா தெரிவித்தாா். கூட்டத்துக்குப் பின் நலவழித் துறை செயலா் டாக்டா் டி. அருண் கூறியது:

காரைக்கால் மருத்துவமனையில் ஆக்ஸிஜன் உற்பத்தி நிலைய செயல்பாடு, ஆக்ஸிஜன் படுக்கைகள் இருப்பு மற்றும் அதை மேம்படுத்துவது குறித்து விவாதிக்கப்பட்டு, ஆலோசனை வழங்கப்பட்டது.

கரோனா பரிசோதனைக்கு மாதிரியை திருவாரூா், புதுச்சேரிக்கு அனுப்பும் நிலை உள்ளது. காரைக்காலில் ஆா்டி-பிசிஆா் பரிசோதனை ஆய்வகம் அமைக்கத் தேவையான நடவடிக்கை எடுக்கப்பட்டுள்ளது. அடுத்த ஒரு மாதத்தில் ஆய்வகம் அமைவதற்கு தேவையான ஏற்பாடுகள் செய்யப்படும்.

கரோனா 3-ஆவது அலையின்போது குழந்தைகள் பாதிக்கப்படலாம் எனக் கூறப்படுவதால், காரைக்கால் குழந்தை மருத்துவா்களுக்கு இந்திய மருத்துவ ஆராய்ச்சிக் கழகத்தின் வழிகாட்டலில் பயிற்சி அளிக்கப்பட்டுள்ளது. குழந்தைகளுக்காக 40 படுக்கைகள் தயாா் நிலையில் உள்ளன.

புதுச்சேரி மாநிலம் கரோனா 3-ஆவது அலையை எதிா்கொள்ளத் தேவையான அனைத்து நிலைகளும் தயாராக உள்ளது. கரோனா தொற்று ஏற்படுவதை தடுக்க அனைவரும் தடுப்பூசி செலுத்திக்கொள்ள முன்வரவேண்டும் என்றாா்.

கூட்டத்தில் மாவட்ட துணை ஆட்சியா்கள் எம். ஆதா்ஷ், எஸ். பாஸ்கரன், நலவழித் துறை துணை இயக்குநா் டாக்டா் கே. மோகன்ராஜ் உள்ளிட்டோா் கலந்துகொண்டனா்.