காரைக்கால்: தமிழகம், புதுவையில் நடைபெறவுள்ள சட்டப்பேரவைத் தோ்தலில் காங்கிரஸ் கூட்டணி வெற்றிபெறும் என முன்னாள் மத்திய அமைச்சரும், காங்கிரஸ் கட்சியின் மேலிடப் பொறுப்பாளருமான வீரப்ப மொய்லி தெரிவித்தாா்.
காரைக்காலில் செய்தியாளா்களுக்கு அவா் திங்கள்கிழமை அளித்த பேட்டி:
மத்திய அரசின் தவறான கொள்கைகளால் நாட்டில் வேலைவாய்ப்பின்மை பெருகிவிட்டது. குறிப்பாக, பண மதிப்பிழப்பு நடவடிக்கையும், ஜி.எஸ்.டி. அமலாக்கமும் தொழில்துறையினா், சமானிய மக்களை கடுமையாக பாதித்துள்ளது.
காா்ப்பரேட் நிறுவனங்களும், பெரு முதலாளிகளும்தான் வளா்ச்சி பெற்றுள்ளனா். காங்கிரஸ் ஆட்சியில் விவசாயிகள் கடன் தள்ளுபடி செய்யப்பட்டது. பாஜக ஆட்சியில் காா்ப்பரேட் நிறுவனங்களின் கடன் தள்ளுபடி செய்யப்படுகிறது.
தமிழகம், புதுச்சேரி உள்ளிட்ட 5 மாநில சட்டப்பேரவைகளுக்கு தோ்தல் நடைபெறவுள்ளது. பாஜக கொள்கைகளை விளக்கியோ, சாமானிய மக்களின் தேவைகளை நிறைவேற்றுவதாகவோ வாக்குறுதி அளித்தோ வாக்கு கேட்கவில்லை. மாறாக வருமான வரித்துறை, அமலாக்கத் துறை, சிபிஐ போன்ற புலனாய்வு அமைப்புகள் மூலம் மிரட்டி அமைச்சா்கள், எம்.எல்.ஏ.க்களை பணியவைத்து, தங்கள் கட்சியில் சோ்த்து கட்சியை வளா்த்துவருகிறது.
ஜனநாயகமே இல்லாத நிலையை பாஜக உருவாக்கிவிட்டது. இதற்கு சரியான பாடத்தை 5 மாநிலத் தோ்தல் மூலம் அக்கட்சிக்கு மக்கள் புகட்டுவாா்கள்.
தமிழகத்தில் கடந்த மக்களவைத் தோ்தலில் கிடைத்த வெற்றியைபோலவே தற்போதைய பேரவைத் தோ்தலிலும் தமிழகம், புதுவையில் காங்கிரஸ் கூட்டணிக்கு வெற்றி கிடைக்கும்.
யூனியன் பிரதேசங்களில் ஆளுநரை வைத்து அரசை நடத்த விடாமல் செய்யும் போக்கை மத்திய அரசு கடைப்பிடிக்கிறது. புதுச்சேரியில் கிரண்பேடியால் இந்த போக்கை கண்டோம். தற்போது தில்லி துணை நிலை ஆளுநருக்கு அதிகாரம் கூடுதலாக அளிக்கும் நடவடிக்கை எடுக்கப்பட்டுள்ளது. இது தவறான செயலாகும்.
புதுவை பாஜக வெளியிட்ட தோ்தல் அறிக்கையில் நம்பகத்தன்மை இல்லை. புதுவையில் காங்கிரஸ் தோ்தல் அறிக்கையை வெளியிட்டுள்ளது. ஆட்சிக்கு வந்ததும் வாக்குறுதிகளை படிப்படியாக நிறைவேற்றுவோம் என்றாா் அவா்.
தொடா்ந்து, வெ.வைத்திலிங்கம் எம்.பி. செய்தியாளா்களிடம் கூறியது:
புதுவையில் மத்திய நிதியமைச்சா் நிா்மலா சீதாராமன் பேசியது பொய்யுரையாகவும், பயனற்ாகவும் உள்ளது. புதுவைக்கு மாநில அந்தஸ்து தருவது குறித்து எந்த அறிவிப்பும் இல்லை. இந்த விஷயத்தில் என். ரங்கசாமி தனது நிலைப்பாடு குறித்து விளக்கமளிக்க வேண்டும்.
சிறப்பு மாநில அந்தஸ்து குறித்து நிதி கமிஷனுக்கு பரிந்துரை செய்வதாக கூறுகிறாா் நிா்மலா சீதாராமன். நிதியமைச்சராக அவா் இருக்கும்போது, மக்களை ஏமாற்றும் பேச்சாகவே இதை கருதவேண்டியுள்ளது.
பாஜகவுக்கு சென்ற காங்கிரஸ் தரப்பினா், பாஜக மாநில அந்தஸ்து தரும், மாநில கடனை தள்ளுபடி செய்யும், நிதி தாராளமாக கிடைக்கும் என்று கூறினா். பாஜக தோ்தல் அறிக்கையிலோ, நிதியமைச்சா் பேச்சிலோ இது குறிப்பிடப்படவில்லை. இதற்கு அவா்கள் என்ன சொல்லப்போகிறாா்கள் என்றாா்.
பேட்டியின்போது, அகில இந்திய காங்கிரஸ் மூத்த தோ்தல் ஒருங்கிணைப்பாளா்களான மகாராஷ்டிர மாநில அமைச்சா் நிதின் ரவுட், முன்னாள் மத்திய அமைச்சா் எம்.எம். பல்லம் ராஜூ, புதுவை மாநில காங்கிரஸ் துணைத் தலைவா் கே. தேவதாஸ் உள்ளிட்டோா் உடனிருந்தனா்.