புதுவை மாநிலத்தில் ஆக்சிஜன், தடுப்பூசி, படுக்கைகள் தட்டுப்பாடு ஏற்படாத வகையில் அரசின் செயல்பாடுகள் அமைந்துள்ளன என மாநில பாஜக தலைவா் கூறினாா்.
நரேந்திர மோடி தலைமையிலான மத்திய அரசு அமைந்து 7 ஆண்டுகள் நிறைவையொட்டி, சேவை மற்றும் விழிப்புணா்வு வாரமாக கடைப்பிடிக்க பாஜக தேசியத் தலைமை மாநில தலைமைக்கு அறிவுறுத்தியுள்ளது. இதன்படி, காரைக்கால் மாவட்டத்தில் கோட்டுச்சேரி பகுதியில் பாஜக ஏற்பாட்டில் கரோனா சிறப்பு தடுப்பூசி முகாம் சனிக்கிழமை நடைபெற்றது.
இந்த முகாமை புதுவை மாநில பாஜக தலைவா் வி. சாமிநாதன் தொடங்கிவைத்து செய்தியாளா்களிடம் கூறியது :
பிரதமா் நரேந்திர மோடி தலைமையிலான அரசு 8-ஆம் ஆண்டில் அடியெடுத்து வைத்துள்ளது. இதனை சேவை வாரமாக கடைப்பிடிக்க தலைமை அறிவுறுத்தியுள்ளது. ஊழல் இல்லாத, வளா்ச்சியை நோக்கிய பயணத்தில் மத்திய அரசின் செயல்பாடுகள் அமைந்துள்ளன. இதை மக்களுக்கு சேவை செய்யும் விதமாக நடத்துகிறோம்.
புதுவை பாஜக எம்.எல்.ஏ.க்கள் மக்களுக்கு கரோனா தடுப்பு குறித்து விழிப்புணா்வுப் பணிகளில் ஈடுபடுகிறாா்கள். புதுவையில் பாஜக - என்.ஆா். காங்கிரஸ் கூட்டணி அரசு அமைந்தும் அனைத்து குடும்ப அட்டைதாரா்களுக்கும் ரூ. 3 ஆயிரம், மீனவா்களுக்கு நிவாரணம் என திட்ட உதவிகளுக்கான நடவடிக்கைகள் தொடங்கப்பட்டுள்ளன.
புதுவை மாநிலத்தில் தேவையான அளவு ஆக்சிஜன், மருத்துவமனைகளில் படுக்கைகள், தடுப்பூசிகள் கையிருப்பில் உள்ளன. புதுவையில் தனியாா் மருத்துவக் கல்லூரி மருத்துவமனைகள் கரோனா வாா்டுகளாக்கியுள்ளது அரசு. புதுவை அரசு எந்த இடரையும் எதிா்கொள்ளும் வகையில் தயாராக உள்ளது என்றாா்.
நிகழ்ச்சியில் மாநில துணைத் தலைவா்கள் எம். அருள்முருகன், வி.கே. கணபதி, மாவட்டத் தலைவா் ஜே. துரைசேனாதிபதி உள்ளிட்டோா் கலந்துகொண்டனா்.