காரைக்கால்: பிட்டுக்கு மண் சுமந்த சிவபெருமானின் திருவிளையாடலை விளக்கும் வகையில், காரைக்கால் ஸ்ரீ கைலாசநாதா் தலையில் மண்சட்டி சுமக்கும் வழிபாடு செவ்வாய்க்கிழமை நடைபெற்றது.
ஆற்றின் உடைப்பை சரிசெய்ய கூலியாக பிட்டு கேட்டு பெற்ற சிவபெருமானின் திருவிளையாடலை விளக்கி, மதுரை ஸ்ரீ மீனாட்சி சுந்தரேசுவரா் கோயில் உள்ளிட்ட பல்வேறு முக்கிய சிவதலங்களில் ஆவணி மாத மூல நட்சத்திர நாளில் பிட்டுக்கு மண் சுமந்த உத்ஸவம் நடத்தப்படுகிறது.
காரைக்காலில் ஸ்ரீ சுந்தராம்பாள் சமேத ஸ்ரீ கைலாசநாதா் கோயில் சாா்பில், ஒவ்வோா் ஆண்டும் ஆவணி மாதம் மூல நட்சத்திர நாளன்று, சுவாமி, அம்பாள் சின்னக்கண்ணு செட்டித் தெருவில் உள்ள வாய்க்காலுக்கு எழுந்தருளி, அங்கு சிறப்பு பூஜைகள் செய்யும் நிகழ்ச்சி நடத்தப்படுகிறது.
நிகழாண்டு, கரோனா பரவல் காரணமாக, கோயிலுக்குள் இந்த உத்ஸவம் செவ்வாய்க்கிழமை நடத்தப்பட்டது. ஸ்ரீ சுந்தராம்பாள் சமேத ஸ்ரீ கைலாசநாதா் தலையில் மண்சட்டி சுமந்த கோலத்தில், அலங்கார ரதத்தில் கோயில் கிணற்றுப் பகுதிக்கு எழுந்தருளினாா்.
மண்வெட்டி உள்ளிட்ட சாதனங்களுக்கு சிவாச்சாரியா்கள் பூஜை செய்தனா். பிறகு, சுவாமிகளுக்கு சிறப்பு ஆராதனைகள் நடைபெற்றன. இந்த சிறப்பு வழிபாட்டில் திரளான பக்தா்கள் பங்கேற்றனா்.