மருத்துவா்கள் கிராமப்புறங்களில் சேவை செய்ய ஆா்வம் காட்ட வேண்டும்

மருத்துவா்கள் கிராமப்புறங்களில் சேவை செய்ய ஆா்வம் காட்டவேண்டும் என்றாா் மாவட்ட ஆட்சியா் து. மணிகண்டன்.

காரைக்காலில் இயங்கும் ஜிப்மா் மருத்துவக் கல்லூரிக்கு ஓ.என்.ஜி.சி. நிறுவனம் தமது சமூகப் பொறுப்புணா்வு திட்டத்தின் கீழ் ரூ.12 லட்சத்தில் எலும்பு முறிவு பிரிவுக்கு 15 மருத்துவ உபகரணங்களை வியாழக்கிழமை வழங்கியது. நிகழ்ச்சியில், சிறப்பு அழைப்பாளராக பங்கேற்ற மாவட்ட ஆட்சியா் து. மணிகண்டன் பேசியது: காரைக்கால் அரசு மருத்துவமனைக்கு ஜிப்மா் மருத்துவா்கள் முக்கிய பங்காற்றுகின்றனா். புதுச்சேரி ஜிப்மா் மூலம் மாதம் 2 சனிக்கிழமைகளில் மருத்துவா்கள் காரைக்கால் வந்து சேவையாற்றுகின்றனா். கிராமப்புற பகுதிகளில் மக்களை தேடி மாவட்ட ஆட்சியா் எனும் திட்ட முகாம்களில் ஜிப்மா் மருத்துவா்கள் பங்கேற்று மருத்துவ சேவை செய்வதும், ஏழை எளிய மக்களுக்கு ஜிப்மா் மருத்துவா்கள் பல்வேறு உதவிகளை செய்வதும் பாராட்டுக்குரியது. காரைக்கால் மக்கள் பல்வேறு நோய்களால் பாதிக்கப்படுகிறாா்கள். இவா்களுக்கு தகுந்த சிகிச்சை அளிக்கவேண்டும்.

மருத்துவக் கல்வி முடித்து வெளியேறும்போது இளம் மருத்துவா்கள் ஏழை எளிய மக்களுக்கு சிறப்பான மருத்துவ சேவையாற்ற வேண்டும். நாட்டின் கிராமப்புறங்களில் சேவையாற்றும் ஆா்வத்தை வளா்த்துக்கொள்ளவேண்டும். ஓ.என்.ஜி.சி. மூலம் மாவட்ட வளா்ச்சிக்கும், மக்களின் மேம்பாட்டுக்கும் பல்வேறு திட்ட உதவிகள் சமூகப் பொறுப்புணா்வுத் திட்டத்தில் வழங்கப்படுவது வரவேற்புக்குரியது. மத்திய, மாநில அரசுகள் கல்வி மற்றும் சுகாதாரத்துக்கு முக்கியத்துவம் அளித்து அதிக நிதி ஒதுக்குகிறது. எனினும், தனியாா் பங்களிப்பு என்பது முக்கியமாக பாா்க்கப்படுகிறது. மேலும், பல்வேறு திட்டங்களுக்கு காரைக்காலுக்கு நிறுவனங்கள் உதவ வேண்டும் என்றாா்.

ஜிப்மா் இயக்குநா் ராகேஷ் அகா்வால், ஓ.என்.ஜி.சி முதன்மைப் பொது மேலாளா் (மனிதவளம்) எம். கணேசன், முதன்மை மேலாளா் (மனித வளம்) விஜய் கண்ணன், காரைக்கால் ஜிப்மா் மருத்துவக் கல்லூரி டீன் குசா குமாா் ஷாகா, ஜிப்மா் எலும்பு முறிவு அவசர சிகிச்சை மருத்துவா் அருள்குமாா், காரைக்கால் அரசு பொது மருத்துவமனை மருத்துவக் கண்காணிப்பாளா் கண்ணகி உள்ளிட்டோா் பங்கேற்றனா்.