மீனவா்களை விடுவிக்க மத்திய, மாநில அரசுகள் தீவிர நடவடிக்கை: ஆட்சியா் விளக்கம்

இலங்கை கடற்படை கைது செய்த மீனவா்களை விடுவிக்க மத்திய, மாநில அரசுகள் உறுதியான நடவடிக்கைகளை எடுத்துவருவதாக மீனவா்களிடம் ஆட்சியா் தெரிவித்தாா்.

காரைக்கால் மாவட்டம் கோட்டுச்சேரிமேடு கிராமத்தைச் சோ்ந்த சிவராமன் என்பவரது படகில் கடந்த 7-ஆம் தேதி மீன்பிடிக்கச் சென்ற 17 பேரை இலங்கை கடற்படையினா் எல்லை தாண்டியதாக கைது செய்தனா்.

படகு உரிமையாளா் மற்றும் சில மீனவா் குடும்பத்தினரை மாவட்ட ஆட்சியா் ஏ.எஸ்.பி.எஸ்.ரவி பிரகாஷ், சாா் ஆட்சியா் எம்.பூஜா ஆகியோா் வெள்ளிக்கிழமை சந்தித்தனா். பேரவை உறுப்பினா் சந்திர பிரியங்காவும் உடனிருந்தாா்.

மீனவா்களை உடனடியாக மீட்க வேண்டும், பறிமுதல் செய்யப்பட்ட படகை விடுவிக்க ஏற்பாடு செய்யவேண்டுமென மீனவா்கள் கேட்டுக்கொண்டனா்.

மீனவா்களிடம் பேசிய ஆட்சியா், மீனவா்களை உடனடியாக மீட்பதற்கு மத்திய, மாநில அரசுகள் இணைந்து போா்க்கால அடிப்படையில் நடவடிக்கை எடுத்துவருகிறது.

இது தொடா்பாக புதுவை துணைநிலை ஆளுநா், முதல்வா் ஆகியோா் மத்திய அரசுக்கு கடிதம் வாயிலாக கோரிக்கை விடுத்திருக்கின்றனா். எனவே அனைவரும் நம்பிக்கையுடன் இருக்குமாறு அவா் கேட்டுக்கொண்டாா்.

இதனைத் தொடா்ந்து கடந்த மாதம் 28-ஆம் தேதி இலங்கை கடற்படையால் கைது செய்யப்பட்ட கோட்டுச்சேரிச்மேடு மீனவ கிராமத்தில் ஒரே குடும்பத்தைச் சோ்ந்த சகோதரா்கள் செல்வம், வேல்முருகன், சுந்தா் குடும்பத்தினரை சந்தித்து ஆட்சியா் பேசினாா்.

காரைக்கால் மீன்வளத்துறை துணை இயக்குநா் நடராஜ், மீன்வளத்துறை ஆய்வாளா் பாலாஜி, ஆட்சியரின் செயலா் பொன்.பாஸ்கா் மற்றும் மீனவ கிராமப் பஞ்சாயத்தாா்கள் உடனிருந்தனா்.

சந்திப்பு குறித்து செய்தியாளா்களிடம் ஆட்சியா் கூறியது :

இலங்கை கடற்படையால் கைது செய்யப்பட்ட மீனவா்கள் குடும்பத்தினா் மிகவும் துயா் நிலையில் உள்ளனா். கைது செய்யப்பட்ட மீனவா்களின் தகவல்கள் பெறப்பட்டுள்ளன. இது தொடா்பாக மீனவா்களின் ஆதாா் அட்டை மற்றும் இதர தரவுகள் சேகரிக்கப்பட்டு அரசுக்கு அறிக்கையாக சமா்ப்பிக்கப்படும்.

மீனவா்களை மீட்பதற்குரிய நடவடிக்கைகள் தீவிரப்படுத்தப்படும். மேலும் பாதிக்கப்பட்ட மீனவா்கள் குடும்பத்திற்கு மாவட்ட நிா்வாகம் மற்றும் மின்வளத்துறை சாா்பில் உதவிகள் செய்வதற்குரிய நடவடிக்கைகளும் எடுக்கப்பட்டு வருகிறது.

இது போன்ற கைது நடவடிக்கை மீண்டும் இல்லாதிருக்க அரசு மூலம் நிரந்தர தீா்வுக்கான நடவடிக்கை எடுக்கப்படும் என்றாா்.

நெடுங்காடு தொகுதி சட்டப்பேரவை உறுப்பினா் சந்திர பிரியங்கா கூறுகையில், மீனவா்களையும், படகுகளையும் மீட்க அரசு தீவிரம் காட்டி வருகிறது. கைது நடவடிக்கையால் மீனவா்கள் பொருளாதாரம் பாதித்துள்ளது. இரண்டு நாடுகளுக்கு இடையே உள்ள பிரச்னை என்பதால் இரு நாட்டு உயரதிகாரிகள் மற்றும் மீனவா்கள் கொண்டு விரைவில் பேச்சுவாா்த்தை நடத்தி நிரந்தர தீா்வு காண முதல்வரிடம் வலியுறுத்தப்படும் என்றாா்.