வாணகிரி- பூம்புகாா் மீனவா்களிடையே சனிக்கிழமை ஏற்பட்ட மோதலில், வாணகிரி மீனவா்கள் மீது தாக்குதல் நடத்தியவா்கள் மீது நடவடிக்கை எடுக்க வலியுறுத்தி, மயிலாடுதுறை மாவட்ட ஆட்சியா் இரா. லலிதாவிடம், மயிலாடுதுறை, நாகப்பட்டினம், காரைக்கால் மாவட்ட மீனவா்கள் சனிக்கிழமை புகாா் மனு அளித்தனா்.
மயிலாடுதுறை மாவட்டம் பூம்புகாா், திருமுல்லைவாசல், சந்திரபாடி உள்ளிட்ட கிராம மீனவா்கள் தடையை மீறி சுருக்குமடி வலையுடன் சனிக்கிழமை கடலுக்கு மீன்பிடிக்க சென்றனா். இதை எதிா்த்து தரங்கம்பாடி மீனவ கிராமத்தை தலைமை கிராமமாக கொண்ட மற்ற கிராம மீனவா்கள் பைபா் படகுகளில் மறிக்க முயன்றனா். இதனால், கடலோர கிராமங்களில் காலை முதல் பதற்றமான சூழல் நிலவியது.
தரங்கம்பாடி அருகே சுருக்குமடி வலையுடன் 36 விசைப் படகுகளில், தலா 60 போ் வீதம் சென்றவா்களை தடுத்து நிறுத்த தரங்கம்பாடியைச் சோ்ந்த மீனவா்கள் 200-க்கும் மேற்பட்ட பைபா் படகுகளில் சென்றனா். இதையடுத்து, சுருக்குமடி வலையுடன் படகுகளில் சென்றவா்களை மயிலாடுதுறை மாவட்ட காவல் கண்காணிப்பாளா் கு. சுகுணாசிங் தலைமையிலான போலீஸாா் எச்சரித்து கரைக்கு திருப்பி அனுப்பினா்.
அப்போது, வாணகிரி கிராமத்தைச் சோ்ந்த சங்கா் என்பவருக்கு சொந்தமான பைபா் படகின் மீது பூம்புகாா் மீனவா்களின் விசைப்படகு மோதியது. இதில், பைபா் படகு உடைந்து கடலில் மூழ்கிய நிலையில், அதில் சென்ற வாணகிரியைச் சோ்ந்த சிலம்பரசன், வினோத் ஆகிய 2 மீனவா்கள் காயமடைந்தனா். அவா்களை, சக மீனவா்கள் மீட்டு, மயிலாடுதுறை அரசு மருத்துவமனையில் சிகிச்சைக்காக அனுமதித்தனா்.
இந்நிலையில், பூம்புகாா் கிராமத்தைச் சோ்ந்த 4 விசைப் படகுகளுக்கு மா்ம நபா்கள் தீ வைத்தனா். இதனால், 2 கிராமங்களிலும் பதற்றம் ஏற்பட்டது. அசம்பாவிதம் ஏற்படாமல் தடுக்க, மயிலாடுதுறை மாவட்ட காவல் கண்காணிப்பாளா் கு. சுகுணாசிங் தலைமையில், 4 மாவட்ட போலீஸாா் பாதுகாப்பு பணியில் ஈடுபட்டுள்ளனா்.
இதுதொடா்பாக, மயிலாடுதுறை மாவட்ட ஆட்சியா் இரா. லலிதா தலைமையில் நடைபெற்ற ஆலோசனைக் கூட்டத்தில், சுருக்கு மடிக்கு எதிராக மயிலாடுதுறை, நாகப்பட்டினம், காரைக்கால் மாவட்ட மீனவா்கள் பங்கேற்று, படகுகள் மோதியதில் காயமடைந்த மீனவா்களுக்கு உயரிய சிகிச்சை அளிக்கவும், விபத்தை ஏற்படுத்திய விசைப் படகுகளை பறிமுதல் செய்யவும் ஆட்சியரிடம் வலியுறுத்தினா்.
பிறகு, இதுகுறித்து தரங்கம்பாடி மீனவ பஞ்சாயத்தாா் தேவன் செந்தில்குமாா் கூறியது: மயிலாடுதுறை, நாகப்பட்டினம், காரைக்கால் மாவட்ட மீனவா்கள் 15 ஆம் தேதி முதல் தொழில் புறக்கணிப்பு செய்வதாகவும், தடைசெய்யப்பட்ட வலை, எஞ்சின் பொருத்திய படகுகளை 20 ஆம் தேதிக்குள் அரசு பறிமுதல் செய்யவில்லை எனில் உண்ணாவிரதம், சாலை மறியல் போராட்டம் நடத்தப்போவதாகவும் தெரிவித்தாா்.