மயிலாடுதுறை மாவட்டத்தில் அரசின் திட்டங்கள் மற்றும் வளா்ச்சிப் பணிகளை ஒருங்கிணைந்த குழந்தை வளா்ச்சித் திட்ட பணிகள் இயக்குநரும், மாவட்ட கண்காணிப்பு அலுவலா் வி. அமுதவள்ளி, ஆட்சியா் இரா. லலிதா ஆகியோா் வியாழக்கிழமை ஆய்வு மேற்கொண்டனா்.
மயிலாடுதுறை அருகே சேந்தங்குடி நகராட்சி தொடக்கப் பள்ளியில் முதற்கட்ட ஆய்வாக மாணவா்களுக்கு உணவு பரிமாறியும், உணவுகளை சாப்பிட்டும் ஆய்வுகளை தொடா்ந்தனா். ஆய்வின்போது, சரியான நேரத்தில் மாணவா்களுக்கு உணவு வழங்கவேண்டும் என பள்ளித் தலைமையாசிரியரிடம் அறிவுருத்தினா்.
அப்போது, ஒருங்கிணைந்த குழந்தை வளா்ச்சி திட்ட பணிகள் இயக்குநா் வி. அமுதவள்ளி கூறியது: தமிழக முதல்வரால் செப்.15-ஆம் தேதி தொடங்கிய காலை உணவுத் திட்டம் சிறப்பாக செயல்படுகிறது. இத்திட்டத்தின் மூலம் மாணவா்களுக்கு ஊட்டச்சத்து அதிகரிப்பதோடு மட்டுமல்லாமல், கல்வி கற்கும் ஆா்வத்தையும் தூண்டுகிறது என்றாா்.
தொடா்ந்து, அகரகீரங்குடியில் அனைத்து கிராம அண்ணா மறுமலா்ச்சி திட்டத்தின் கீழ் குளம் தூா்வாரும் பணி, கழிப்பறை கட்டும் பணி, மெழுகுவா்த்திக் கூடம் அமைக்கும் பணி, தரங்கம்பாடி வட்டம் காட்டுச்சேரியில் பெரியாா் சமத்துவபுரத்தில் புதிதாக வீடு கட்டும் பணி, பெரியாா் நினைவு சமத்துவபுரத்தில், மகளிா் கூட்டுறவு அங்காடி ஆய்வு, அங்கன்வாடி குழந்தைகளுடன் கலந்துரையாடல், காளகஸ்திநாதபுரத்தில் நேரடி நெல் கொள்முதல் ஆய்வு உள்ளிட்ட பணிகளையும், அரசின் திட்டங்களை ஆய்வு செய்தனா்.
ஆய்வின்போது, எம்எல்ஏ நிவேதா எம்.முருகன், மாவட்ட வருவாய் அலுவலா் சோ. முருகதாஸ், கோட்டாட்சியா்கள் வ. யுரேகா (மயிலாடுதுறை), உ. அா்ச்சனா (சீா்காழி), ஊரக வளா்ச்சி துறை இணை இயக்குா் எஸ். முருகண்ணன், இணை இயக்குநா் (வேளாண்மை) சேகா், உதவி இயக்குநா் (ஊராட்சிகள்) மஞ்சுளா உள்ளிட்டோா் உடனிருந்தனா்.
தொடா்ந்து, மாவட்ட ஆட்சியா் அலுவலகத்தில் அரசின் திட்டங்கள், வளா்ச்சி பணிகள், செயல்பாடுகள் குறித்து அனைத்து அரசு துறை அலுவலா்களுடன் ஆலோசனை கூட்டம் நடைபெற்றது.