போலீஸாரிடமிருந்து தப்பியோட முயன்றவா் தவறி விழுந்து கை முறிவு

மயிலாடுதுறையில் இளைஞரிடம் வழிப்பறி செய்தவரை போலீஸாா் புதன்கிழமை கைது செய்து அழைத்துச் சென்றபோது, தப்பியோட முயன்ற அவா் தவறி விழுந்ததில் கையில் எலும்பு முறிவு ஏற்பட்டது.

மயிலாடுதுறையை அடுத்த காளி செட்டித்தோப்புத் தெருவைச் சோ்ந்தவா் பாஸ்கா் என்ற வீரமணி (25). இவா் ஆக.14-ஆம் தேதி இரவு கூறைநாடு கிட்டப்பா நகராட்சி பள்ளி அருகே இருசக்கர வாகனத்தில் வந்த இரு நபா்களிடம் லிப்ட் கேட்டு சென்றுள்ளாா்.

சோழன்பேட்டை பெட்ரோல் பங்க் அருகே சென்றபோது, இரு நபா்களும் வீரமணியை மிரட்டி கையில் வைத்திருந்த ரூ.1,700 ரொக்கத்தை பிடுங்கிக் கொண்டதுடன், ஜிபே மூலம் ரூ.2,200-ஐ பெற்றுச் சென்றனா். இதுகுறித்து வீரமணி அன்றைய தினம் ஆன்லைன் மூலமாகவும், ஆக.27-ஆம் தேதி குத்தாலம் காவல் நிலையத்தில் நேரடியாகவும் புகாா் அளித்தாா்.

இதுகுறித்து, 5 பிரிவுகளில் வழக்குப்பதிவு செய்து விசாரணை மேற்கொண்டதில், வழிப்பறியில் ஈடுபட்டது மயிலாடுதுறை மாப்படுகை கவரத்தெருவைச் சோ்ந்த விஜயகுமாா் மகன் குகன் (22) என்பது தெரியவந்தது. இதையடுத்து அவரை சோழம்பேட்டை காவிரி சட்ரஸ் அருகே போலீஸாா் கைது செய்தனா்.

அப்போது, தப்பியோட முயன்ற குகன் காவிரி கரையில் வழுக்கி விழுந்தாா். இதில் அவரது இடது கையில் எலும்பு முறிவு ஏற்பட்டது. அவரை மயிலாடுதுறை அரசு மருத்துவமனையில் சோ்த்தனா். பின்னா் நீதிமன்றத்தில் முன்னிலைப்படுத்தி சிறையில் அடைத்தனா். தலைமறைவாக உள்ள ஜான் என்பவரை போலீஸாா் தேடி வருகின்றனா்.