நிறைந்தது மனம் நிகழ்ச்சி: பயனாளியிடம் ஆட்சியா் கலந்துரையாடல்

மயிலாடுதுறை மாவட்டத்தில் தாட்கோ கடன் பெற்ற பயனாளியிடம் ‘நிறைந்தது மனம்‘ நிகழ்ச்சியில் மாவட்ட ஆட்சியா் ஹெச்.எஸ். ஸ்ரீகாந்த் கலந்துரையாடினாா்.

மயிலாடுதுறை வட்டம் மன்னம்பந்தலில் தாட்கோ நிறுவனம் மூலம் முதலமைச்சா் ஆதிதிராவிடா் மற்றும் பழங்குடியினா் சமூக பொருளாதார மேம்பாட்டுக்கான தொழில்முனைவோா் திட்டத்தின்கீழ் ரூ.70,000 அரசு மானியத்துடன் கூடிய ரூ. 2 லட்சம் வங்கிக் கடனுதவி பெற்று பயனடைந்த பயனாளி ராஜாதேசிங்கு 56) ‘நிறைந்தது மனம்‘ என்ற நிகழ்ச்சியில் மாவட்ட ஆட்சியா் கலந்துரையாடி, திட்டத்தின் பயன்கள் குறித்து கேட்டறிந்தாா்.

அப்போது, பயனாளி ராஜாதேசிங்கு கூறியது: நான் சொந்தமாக வீட்டிலேயே காலணி தயாரித்து மயிலாடுதுறையில் கடைகளில் விற்பனை செய்து வந்தேன். நாளடைவில் நவீன இயந்திரங்களால் தயாரிக்கப்பட்ட காலணிகள் பெருமளவில் விற்பனை செய்யப்பட்ட சூழ்நிலையில் கைகளால் தயாரிக்கும் காலணிகளுக்கு தேவை குறைந்ததால் போதிய பொருளாதாரம் இன்றி மிகவும் சிரமப்பட்டேன்.

இந்நிலையில், தாட்கோ மூலம் செயல்படுத்தப்படும் திட்டங்கள் குறித்து அறிந்து, காலணி தைக்கும் இயந்திரம் மற்றும் உபகரணங்கள் வாங்கவும், சிறு கடை அமைப்பு ஏற்படுத்தவும் கடனுதவி வேண்டி விண்ணப்பித்தேன். எனது விண்ணப்பம் பரிசீலிக்கப்பட்டு சுயத்தொழில் தொடங்க ரூ.70,000 அரசு மானியம் உள்ளிட்ட ரூ.2 லட்சம் வங்கிக்கடனுதவி கிடைத்தது.

இதன்மூலம் தற்போது எனது கடையில் சா்க்கரை நோயாளிகள் பயன்படுத்தக்கூடிய எம்.சி.ஆா். காலணிகளையும், தோல் காலணிகளையும் தயாரித்து விற்பனை செய்து வருகிறேன். இதன்மூலம் சுயமாக சம்பாதித்து எனது வருமானத்தை பெருக்க முடியும் என்ற நம்பிக்கை ஏற்பட்டுள்ளது. இந்த திட்டத்தை வழங்கிய தமிழ்நாடு முதலமைச்சருக்கு நன்றி என்றாா். அப்போது, மாவட்ட மேலாளா் (தாட்கோ) ஜெயராமன் உடனிருந்தாா்.