செம்பனார்கோவில் குமரன் கோயிலில் தைப்பூசத் திருவிழா

நாகை மாவட்டம், செம்பனார்கோவிலில் உள்ள குமரன்கோயிலில் தைப்பூசத் திருவிழா திங்கள்கிழமை நடைபெற்றது.  
இக்கோயிலில் தைப்பூசத் திருவிழா ஜன. 12-ஆம் தேதி கொடியேற்றத்துடன் தொடங்கியது. தொடர்ந்து, தினமும் முருகப் பெருமான் சிறப்பு அலங்காரத்தில் வீதியுலா வரும் நிகழ்ச்சி நடைபெற்றது. 
விழாவின் 8-ஆம் நாளில் முருகப் பெருமான், சுவர்ணபுரீசுவரர் கோயிலில் எழுந்தருளி சுகந்த குந்தளாம்பிகை அம்மனிடம் வேல் வாங்கும் நிகழ்ச்சியும், பின்னர் குமரன் கோயில் எதிரே சூரசம்ஹாரமும் நடைபெற்றது. 9-ஆம் நாள் இரவு திருக்கல்யாணம் நடைபெற்றது. 
தொடர்ந்து, தைப் பூசத் தினமான திங்கள்கிழமை காலை வள்ளி, தெய்வானை சமேத சண்முக சுப்ரமணிய சுவாமிக்கு மகா அபிஷேகம் நடைபெற்றது. பின்னர், தங்க கவசம் அணிவிக்கப்பட்டு, உலக நன்மைக்காக சண்முகார்ச்சனை நடைபெற்றது.
பின்னர், வள்ளி, தெய்வானையுடன் முருகப் பெருமான் காவிரி ஆற்றங்கரைக்கு எழுந்தருளி தீர்த்தவாரி நடைபெற்றது. 
இதில், திரளான பக்தர்கள் பங்கேற்று சுவாமி தரிசனம் செய்தனர்.  இதற்கான ஏற்பாடுகளை கோயிலின் ஆய்வாளர் பாலு, செயல் அலுவலர் முருகேசன் மற்றும் குடியிருப்போர் பொது நலச் சங்கத்தினர், பக்தர்கள் செய்திருந்தனர்.