Enable Javscript for better performance
கோரக்கச் சித்தா் ஆசிரமத்தில் ஐப்பசி பௌா்ணமி, பரணி விழா- Dinamani

சுடச்சுட

    

    கோரக்கச் சித்தா் ஆசிரமத்தில் ஐப்பசி பௌா்ணமி, பரணி விழா

    By DIN  |   Published on : 12th November 2019 11:55 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    1913ng11god1_1111chn_5

    நாகை மாவட்டம், வடக்குப் பொய்கைநல்லூா் கோரக்கச் சித்தா் ஆசிரமத்தில் ஐப்பசி பௌா்ணமி, பரணி பெருவிழா சிறப்பு வழிபாடு மற்றும் ஆசிரம முகப்பு மண்டபம், தங்க முலாம் பூசப்பட்ட கருவறை திறப்பு விழா திங்கள்கிழமை நடைபெற்றன. இந்நிகழ்ச்சிகளில், வேளாக்குறிச்சி ஆதீனம் பங்கேற்று பக்தா்களுக்கு அருளாசி வழங்கினாா்.

    சித்தா் பரம்பரைகளில் நவநாத சித்தா்களில் ஒருவராகவும், முதன்மையான பதினெட்டு சித்தா்களில் ஒருவராகவும் அறியப்படுபவா் கோரக்கச் சித்தா். போகரின்அறிவுரைப்படி நாகையை அடுத்த வடக்குப் பொய்கைநல்லூரில் தவமியற்றி வந்த கோரக்கச் சித்தா் ஐப்பசி மாதம் பரணி நட்சத்திரத்தில் ஜீவ சமாதி கூடினாா் என நம்பப்படுகிறது.

    இதன்படி, நாகை மாவட்டம், வடக்குப் பொய்கைநல்லூரில் உள்ள கோரக்கச் சித்தா் ஆசிரமத்தில் ஆண்டுதோறும் ஐப்பசி பௌா்ணமி, பரணி பெருவிழா சிறப்பாக கொண்டாடப்பட்டு வருகிறது.

    நிகழாண்டுக்கான ஐப்பசி பௌா்ணமி, பரணி பெருவிழா நவம்பா் 10- ஆம் தேதி தொடங்கியது. இதையொட்டி, கோரக்கச் சித்தா் ஆசிரமத்தில் சிறப்பு வழிபாடுகள் மற்றும் அபிஷேக -ஆராதனைகள், அன்னாபிஷேகம் நடைபெற்றன.

    இதன் தொடா்ச்சியாக, ஐப்பசி பௌா்ணமி, பரணி விழா திங்கள்கிழமை நடைபெற்றது. இதையொட்டி, அதிகாலை 4 மணிக்கு திருவருட்பா அகவல் பாராயணம் மற்றும் சந்திரரேகை பாராயணமும், 8 மணியவில் சிறப்பு வழிபாடுகள், அன்னதானம் ஆகியவை நடைபெற்றன.

    தொடா்ந்து, விழாவின் சிறப்பு நிகழ்ச்சியாக கோரக்கச் சித்தா் ஆசிரம முகப்பில் பொலிவுப்படுத்தப்பட்ட அரங்கம் மற்றும் அதற்கான கல்வெட்டு ஆகியவற்றை வேளாக்குறிச்சி ஆதீனம் ஸ்ரீலஸ்ரீசத்திய ஞான மகாதேவ தேசிக பரமாச்சாா்ய சுவாமிகள் திறந்து வைத்து அருளாசி வழங்கினாா்.

    பின்னா், கோரக்கச் சித்தா் சன்னிதியில் நடைபெற்ற சிறப்பு வழிபாடுகளில் பங்கேற்ற ஆதீனம், பக்தா்களுக்கு அருளாசி வழங்கினாா். முன்னதாக, வேளாக்குறிச்சிஆதீனத்துக்கு வடக்குப் பொய்கைநல்லூா் ஸ்ரீ நந்தி நாதேசுவர சுவாமி கோயிலில் பூரண கும்பமரியாதை அளிக்கப்பட்டு, ஊா்வலமாக கோரக்கச் சித்தா் ஆசிரமத்துக்கு அழைத்துவரப்பட்டாா்.

    இதைத் தொடா்ந்து, தங்க முலாம் பூசப்பட்ட கருவறை சுற்று பிராகாரத்தை, சிட்டி யூனியன் வங்கி முதன்மைச் செயல் அலுவலா் நா. காமகோடி திறந்து வைத்தாா். கோரக்கச் சித்தா் அறக்கட்டளை சாா்பில் நா. காமகோடிக்கு பூரண கும்பமரியாதை அளிக்கப்பட்டது.

    இந்நிகழ்ச்சிகளில் திருவலம் சா்வ மங்களா பீடம் ஸ்ரீலஸ்ரீ சாந்தா சுவாமிகள், கோரக்கச் சித்தா் ஆசிரம அறக்கட்டளை நிா்வாக அறங்காவலா் ப. உ. சண்முகம், முன்னாள் அமைச்சா் ஆா். ஜீவானந்தம், நாகை இந்திய வா்த்தக தொழிற்குழுமத் தலைவா் ஆா். கே. ரவி, வடக்குப் பொய்கைநல்லூரைச் சோ்ந்த மு. சிங்காரவேல், ஓய்வுபெற்ற ராணுவவீரா் ச. கும்பலிங்கம், நாகை மாவட்ட தனியாா் பேருந்து உரிமையாளா்கள் சங்கத் தலைவா் எஸ். ஆா். சிவபெருமாள் மற்றும் ஆசிரம அறக்கட்டளை உறுப்பினா்கள், பக்தா்கள் கலந்துகொண்டனா். அருள்மிகு கோரக்கா் மழலையா் மற்றும் தொடக்கப்பள்ளி மாணவியரின் பரதநாட்டிய நிகழ்ச்சிகள் நடைபெற்றன. நிகழ்ச்சிகளை நாகை நாகராஜன் தொகுத்து வழங்கினாா்.

     

     

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai