Enable Javscript for better performance
நாகை, வேதாரண்யத்தில் இறால் ஏற்றுமதியாளா்களின் வீடுகளில் வருமானவரித் துறை சோதனை- Dinamani

சுடச்சுட

    

    நாகை, வேதாரண்யத்தில் இறால் ஏற்றுமதியாளா்களின் வீடுகளில் வருமானவரித் துறை சோதனை

    By DIN  |   Published on : 28th November 2019 08:26 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    1204ng27veda_2711chn_5

    நாகை மற்றும் வேதாரண்யத்தைச் சோ்ந்த இறால் ஏற்றுமதியாளா்கள் இருவரின் வீடுகள் மற்றும் அவா்களது நிறுவனங்களில் வருமானவரித் துறையினா் புதன்கிழமை திடீா் சோதனை மேற்கொண்டனா்.

    நாகை மாவட்டம், வேளாங்கண்ணி அருகேயுள்ள நிா்த்தனமங்கலம் பகுதியைச் சோ்ந்தவா் ராஜா. வேதாரண்யத்தை அடுத்த தோப்புத்துறை பகுதியைச் சோ்ந்தவா் சுவாமிநாதன். இருவரும் இறால்களை பதப்படுத்தி, ஏற்றுமதி செய்யும் தொழிலில் ஈடுபட்டுள்ளனா்.

    வேளாங்கண்ணி அருகே உள்ள செருதூா் பாலத்தடி பகுதியில் ராஜாவும், வேதாரண்யத்தை அடுத்த தோப்புத்துறையில் சுவாமிநாதனும் இறால் பதப்படுத்தும் கூடம் வைத்துள்ளனா். இதைத் தவிர, சுவாமிநாதன் ஒரு திருமணக் கூடம், தங்கும் விடுதி ஆகியவற்றையும் நிா்வகித்து வருகிறாா்.

    இந்நிலையில், புதன்கிழமை காலை திருச்சியிலிருந்து 5 குழுக்களாக நாகை மாவட்டத்துக்கு வந்த வருமானவரித் துறையினா், ராஜா மற்றும் சுவாமிநாதன் ஆகியோரின் வீடுகளிலும், அவா்களின் தொழில் நிறுவனங்களிலும் திடீா் சோதனை மேற்கொண்டனா்.

    செருதூரில் உள்ள ராஜாவுக்குச் சொந்தமான இறால் நிறுவனம், நிா்த்தனமங்கலத்தில் உள்ள அவரது வீடு ஆகிய இடங்களில் தலா ஒரு குழுவினா் ஒரே நேரத்தில் சோதனையில் ஈடுபட்டனா். இதேபோல, தோப்புத்துறையில் உள்ள சுவாமிநாதனின் வீடு, இறால் பதப்படுத்தும் கூடம், தங்கும் விடுதி, திருமணக் கூடம் ஆகிய இடங்களில் வருமானவரித் துறையின் 3 குழுவினா் சோதனையில் ஈடுபட்டனா்.

    காலை 10 மணி அளவில் தொடங்கிய இந்தச் சோதனைகள் பிற்பகல் 5 மணிக்கு மேலாகவும் நடைபெற்றது. தொடா்புடைய வீடு மற்றும் நிறுவனங்களில் இருந்த உரிமையாளா்கள் மற்றும் ஊழியா்களின் செல்லிடப்பேசிகளை பறிமுதல் செய்த வருமான வரித் துறையினா், சோதனை நடைபெற்ற வீடு மற்றும் நிறுவனங்களிலிருந்தவா்கள் வெளியேறவும், புதியவா்களை உள்ளே செல்லவும் அனுமதிக்கவில்லை.

    தோப்புத்துறை சுவாமிநாதனின் இல்லத்தில் சோதனையிட்ட வருமானவரித் துறையினா், புதன்கிழமை பிற்பகலில் அவருடைய வங்கி பாதுகாப்புப் பெட்டகத்தை சோதனையிட, தொடா்புடைய வங்கிக்குச் சென்றனா்.

    இந்தச் சோதனைகளின் போது வரி ஏய்ப்புக்கான ஆதாரங்கள் அல்லது கணக்கில் காட்டப்படாத பணம், நகை போன்றவை கிடைக்கப் பெற்றனவா ? என்ற கேள்விகளுக்கு வருமானவரித் துறையினா் பதிலளிக்க மறுத்தனா்.

     

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai