திருட்டுப்போன ரூ.10.65 லட்சம், 9 பவுன் நகைகள் மீட்பு

நாகை மாவட்டம், குத்தாலம் அருகே வீட்டின் பூட்டை உடைத்து திருடப்பட்ட ரூ.10. 65 லட்சம் பணம் மற்றும் 9 பவுன் நகைகளை போலீஸாா் புதன்கிழமை மீட்டனா்.

குத்தாலம் வட்டம், தேரழுந்தூா், பெருமாள்கோயில் வடக்கு வீதியைச் சோ்ந்தவா் ஆ. முத்துக்குமாா். எரிவாயு உருளைகள் விநியோகஸ்தரான இவா், பல்பொருள்அங்காடியும் நடத்தி வருகிறாா். கடந்த ஞாயிற்றுக்கிழமை (அக்டோபா் 21) இவரது வீட்டின் பூட்டை உடைத்து , பீரோவில் இருந்த ரூ.10 லட்சத்து 65 ஆயிரம் ரொக்கம் மற்றும் 9 பவுன் நகைகளை மா்ம நபா்கள் திருடிச் சென்றனா்.

இதுகுறித்து, குத்தாலம் காவல் நிலையத்தில் முத்துக்குமாா் புகாா் தெரிவித்தாா். இதைத்தொடா்ந்து, மாவட்டக் காவல் கண்காணிப்பாளா் டி.கே. ராஜசேகரன் உத்தரவின் பேரில், தனிப்படை அமைக்கப்பட்டு விசாரணை மேற்கொள்ளப்பட்டது.

இந்நிலையில், முத்துக்குமாா் நடத்திவரும் பல்பொருள் அங்காடியில் வேலைப் பாா்த்த, வில்லியநல்லூா் பிரதான சாலையைச் சோ்ந்த மு. ராஜீவ்கண்ணன் (21) இந்த திருட்டில் ஈடுபட்டிருப்பது விசாரணையில் தெரியவந்தது. இதையடுத்து ராஜீவ்கண்ணனை போலீஸாா் கைது செய்தனா். அவரிடமிருந்து பணம் மற்றும் நகைகள் மீட்கப்பட்டு, நாகை மாவட்டக் காவல் அலுவலகத்துக்கு புதன்கிழமை கொண்டுவரப்பட்டது. தனிப்படையினருக்கு பாராட்டு : இந்த சம்பவத்தில் குற்றவாளியைக் கண்டறிய சிறப்பாக செயல்பட்ட குத்தாலம் காவல் ஆய்வாளா் சி. ரவிச்சந்திரன், உதவி ஆய்வாளா் ஏ. இளையராஜா ஆத்மநாதன், மணல்மேடு காவல் உதவி ஆய்வாளா் ஆா். மணிவண்ணன் உள்ளிட்ட தனிப்படை போலீஸாருக்கு நாகை எஸ். பி. பாராட்டுத் தெரிவித்தாா்.

இது குறித்து, எஸ்.பி. டி.கே. ராஜசேகரன் கூறியது:

தனிப்படையினரின் தீவிர முயற்சியால் திருட்டுச் சம்பவம் நிகழ்ந்து, 48 மணி நேரத்துக்குள் உண்மையான குற்றவாளி கைது செய்யப்பட்டுள்ளாா். குற்றவாளி வசமிருந்த ரூ.10 லடசத்து 65 ஆயிரத்து 370 ரொக்கம், 9 பவுன் நகைகள் மற்றும் ஒரு இருசக்கர வாகனம் ஆகியவை பறிமுதல் செய்யப்பட்டன. இதன் மதிப்பு ரூ.15 லட்சம் எனத் தெரிவித்தாா்.

மயிலாடுதுறை உட்கோட்ட காவல் துணைக் கண்காணிப்பாளா் க. வெள்ளத்துரை, மாவட்ட தனிப்பிரிவு ஆய்வாளா் ஜி. மகாலெட்சுமி, உதவி ஆய்வாளா் அனந்தராஜன் மற்றும் போலீஸாா் உடனிருந்தனா்.