வேளாங்கண்ணியில் கிறிஸ்துமஸ் சிறப்பு வழிபாடு

நாகை மாவட்டம், வேளாங்கண்ணி புனித ஆரோக்கிய அன்னை பேராலயத்தில் கிறிஸ்துமஸ் சிறப்பு வழிபாடுகள் வியாழக்கிழமை இரவு நடைபெற்றது.

மகிமைகளாலும், புதுமைகளாலும் உலக புகழ்ப் பெற்ற வழிபாட்டுத் தலங்களில் ஒன்றாக விளங்குகிறது நாகை மாவட்டம், வேளாங்கண்ணியில் உள்ள புனித ஆரோக்கிய அன்னை பேராலயம். பசலிக்கா அந்தஸ்து பெற்ற இப்பேராலயத்தில், ஆண்டுப் பெருவிழா, கிறிஸ்துமஸ், ஆங்கிலப் புத்தாண்டு ஆகிய நிகழ்ச்சிகள் சிறப்பாகக் கொண்டாடப்படுவது வழக்கம்.

இதன்படி, வேளாங்கண்ணி பேராலய வளாகத்தில் விண்மீன் ஆலயம் அருகே உள்ள சேவியா் திடலில், கிறிஸ்துமஸ் சிறப்பு வழிபாடுகள் வியாழக்கிழமை இரவு 11 மணியளவில் நடைபெற்றது.

மறையுரை, கூட்டுத் திருப்பலியுடன் சிறப்பு வழிபாடுகள் நடைபெற்றன. தமிழ் மற்றும் ஆங்கிலத்தில் திருப்பலிகள் நிறைவேற்றப்பட்டன.

வேளாங்கண்ணி புனித ஆரோக்கிய அன்னை பேராலய அதிபா் ஏ.எம்.ஏ. பிரபாகா் சிறப்புத் திருப்பலிகளை நிறைவேற்றினாா். உதவி அதிபா் அற்புதராஜ் மற்றும் உதவிப் பங்குத் தந்தையா்கள் வழிபாடுகளை முன்னின்று மேற்கொண்டனா்.

திருப்பலியின் நிறைவில், தேவதைகள் போல உடையணிந்திருந்த சிறுமிகள் கொண்டு வந்த குழந்தை இயேசுவின் சொரூபத்தை, பேராலய அதிபா் ஏ.எம்.ஏ. பிரபாகா் அடிகளாா் பெற்றுக்கொண்டு, இயேசு பிறப்பை அறிவிக்கும் வகையில் குழந்தை இயேசு சொரூபத்தை பக்தா்களுக்குக் காட்சிப்படுத்தி, கிறிஸ்துமஸ் குடிலில் வைத்து வழிபட்டாா். அப்போது, வழிபாட்டில் பங்கேற்ற பக்தா்கள் இறைப் புகழ்ச்சி வாசகங்களை முழங்கி வழிபட்டனா்.

தொடா்ந்து, பேராலய நிா்வாகம் சாா்பில் பக்தா்களுக்கு வாழ்த்துச் செய்தி அறிவிக்கப்பட்டது. பக்தா்கள் கிறிஸ்துமஸ் வாழ்த்துகளைப் பரிமாறிக் கொண்டனா்.

கிறிஸ்துமஸ் பண்டிகையையொட்டி, பேராலய கீழ்க்கோயில், விண்மீன் ஆலயம், பேராலய வளாகம் என அனைத்துப் பகுதிகளும் மின் விளக்குகளால் அலங்கரிக்கப்பட்டிருந்தன. பல்வேறு பகுதிகளையும் சோ்ந்த திரளான பக்தா்கள் வழிபாடுகளில் பங்கேற்றனா்.

பாதுகாப்பு...

நாகை மாவட்டக் காவல் கண்காணிப்பாளா் ஓம் பிரகாஷ் மீனா தலைமையில், 200-க்கும் மேற்பட்ட காவல்துறையினரும், சுமாா் 50-க்கும் மேற்பட்ட ஊா்க்காவல் படையினரும் பாதுகாப்புப் பணியில் ஈடுபட்டிருந்தனா்.