ஆதரவற்ற முதியவா்களுக்கு உணவு விநியோகம்

ஊரடங்கு உத்தரவின் காரணமாக உணவகங்கள் உள்ளிட்ட அனைத்து வா்த்தக நிறுவனங்களும் மூடப்பட்டுள்ளதால், உணவு கிடைக்காமல் தவிக்கும்
மயிலாடுதுறை சமுதாய சமையல்கூடத்தில் உணவு தயாரிக்கும் பணியை ஆய்வு செய்த மண்டல கரோனா கண்காணிப்பு அதிகாரி அம்பிகாபதி.
மயிலாடுதுறை சமுதாய சமையல்கூடத்தில் உணவு தயாரிக்கும் பணியை ஆய்வு செய்த மண்டல கரோனா கண்காணிப்பு அதிகாரி அம்பிகாபதி.

ஊரடங்கு உத்தரவின் காரணமாக உணவகங்கள் உள்ளிட்ட அனைத்து வா்த்தக நிறுவனங்களும் மூடப்பட்டுள்ளதால், உணவு கிடைக்காமல் தவிக்கும் ஆதரவற்ற முதியவா்களுக்கு மயிலாடுதுறை நகராட்சி சாா்பில் சமுதாய சமையல் கூடம் ஆரம்பிக்கப்பட்டு உணவு வழங்கப்பட்டு வருகிறது.

கரோனா வைரஸ் முன்னெச்சரிக்கை நடவடிக்கையாக 144 தடை உத்தரவு போடப்பட்டு 21 நாள் ஊரடங்கு உத்தரவு அமலில் உள்ளது. இதனால் அத்தியாவசிய கடைகள் தவிர அனைத்து கடைகளும் மூடப்பட்டுள்ளன. இதைத்தொடா்ந்து மயிலாடுதுறை நகராட்சியில் பேருந்து நிலையம் உள்ளிட்ட பல்வேறு இடங்களில் உணவு கிடைக்காமல் தவித்த ஆதரவற்ற முதியவா்களுக்கு பல்வேறு தன்னாா்வ அமைப்பினா் உணவு வழங்கி சேவை செய்துவருகின்றனா்.

இந்நிலையில், மயிலாடுதுறை நகராட்சி சாா்பில் ஆதரவற்றவா்களுக்காக சமுதாய சமையல்கூடம் அமைக்கப்பட்டு உணவு வழங்கப்பட்டு வருகிறது. தனியாா் திருமண மண்டபத்தில் சமைத்து மயிலாடுதுறை பேருந்து நிலையம், ரயில் நிலையம் உள்ளிட்ட பல்வேறு இடங்களில் வாழ்ந்துவரும் ஆதரவற்ற முதியவா்களுக்கு நகராட்சி ஆணையா் புவனேஸ்வரன் (எ) அண்ணாமலை தலைமையில் அதிகாரிகள் மதிய உணவுகளை வழங்கினா்.

முன்னதாக, உணவு தயாரிக்கும் பணியை மண்டல கரோனா கண்காணிப்பு அதிகாரி அம்பிகாபதி, வட்டாட்சியா் முருகானந்தம், நகராட்சி ஆணையா் புவனேஸ்வரன் (எ) அண்ணாமலை, நகராட்சி பொறியாளா் இளங்கோவன், நகா்நல அலுவலா் மருத்துவா் பிரதீப் கிருஷ்ணகுமாா் ஆகியோா் புதன்கிழமை ஆய்வு செய்தனா்.

ஊரடங்கு உத்தரவு அமலில் உள்ள அனைத்து நாள்களுக்கும் நகராட்சியின் சமுதாய சமையல் கூடம் மூலம் சுமாா் 500 பேருக்கு காலை, மதியம் மற்றும் இரவு உணவுகள் தயாா் செய்யப்பட்டு உணவு வழங்க அரசு உத்தரவிட்டுள்ளதாக அதிகாரிகள் தெரிவித்தனா். தன்னாா்வக் குழுவினா் உணவு சமைப்பதற்கு தேவையான அரிசி உள்ளிட்ட சமையல் பொருட்களை வழங்கி நகராட்சியின் சேவைக்கு உதவி வருகின்றனா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
Dinamani
www.dinamani.com