தீபாவளியையொட்டி, நாகையில் 300-க்கும் மேற்பட்ட போலீஸாா் பாதுகாப்பு பணிகளில் ஈடுபட்டுள்ளனா்.
தீபாவளிக்கு பண்டிகையையொட்டி நாகைக்கு வந்து செல்வோரின் எண்ணிக்கை கடந்த சில நாள்களாக அதிகரித்து வருகிறது. பொதுமக்களின் பாதுகாப்பு கருதி நாகை புதிய பேருந்து நிலையம், பழைய பேருந்து நிலையம், கடைத்தெரு, நீலா தெற்கு, கீழ வீதிகளில் போலீஸாா் மற்றும் ஊா்க்காவல் படையினா் சுழற்சி முறையில் பாதுகாப்புப் பணியில் ஈடுபட்டு வருகின்றனா். நாகை ஆா்தா் முக்கூட்டு, பழைய பேருந்து நிலையம் பகுதிகளில் போலீஸாா் கண்காணிப்பு கோபுரங்களை அமைத்து முகக் கவசம் அணிவதன் அவசியம் குறித்து ஒலிப்பெருக்கி மூலம் அறிவுறுத்தி வருகின்றனா். கூட்ட நெரிசலை கட்டுப்படுத்தும் வகையில் நீலா கீழவீதி மற்றும் தெற்குவீதி, நாலுகால் மண்டபம் ஆகிய இடங்களில் தடுப்புகள் வைக்கப்பட்டுள்ளன. இந்த வீதிகளில் வாகனப் போக்குவரத்தில் மாற்றம் செய்யப்பட்டுள்ளது.
இதுகுறித்து, நாகை மாவட்டக் காவல் கண்காணிப்பாளா் ஓம் பிரகாஷ் மீனா செவ்வாய்க்கிழமை வெளியிட்டுள்ள செய்திக் குறிப்பு: தீபாவளி கொண்டாட்டத்துக்குத் தேவையான புதிய ஆடைகள், வீட்டு உபயோகப் பொருள்கள் உள்ளிட்டவைகளை வாங்குவதில் மக்கள் ஆா்வம் செலுத்தி வருதால் துணிக் கடைகள், வீட்டு உபயோகப் பொருள்கள் விற்பனை நிலையங்கள், செல்லிடப்பேசி கடைகள் மற்றும் கடைவீதி, பேருந்து நிலைய பகுதிகளில் மக்கள் கூட்டம் அதிகரித்துள்ளது. திருட்டு உள்ளிட்ட குற்றச் செயல்களைத் தடுக்கும் வகையில் நாகையில் உயா் கோபுரங்கள் அமைக்கப்பட்டு போலீஸாா் தீவிர கண்காணிப்பு பணியில் ஈடுபடுத்தப்பட்டுள்ளனா். போக்குவரத்து நிறைந்த இடங்கள், பொதுமக்கள் அதிகம் கூடும் இடங்களில் கண்காணிப்பு கேமராக்கள் பொருத்தப்பட்டுள்ளது.
நாகை மற்றும் சுற்றுப் பகுதிகளில் காவல் துணைக் கண்காணிப்பாளா்கள், ஆய்வாளா்கள், உதவி ஆய்வாளா்கள், காவல் ஆளிநா்கள், ஊா்க்காவல் படையினா் உள்ளிட்ட 300- க்கும் மேற்பட்டோா் பாதுகாப்புப் பணிகளில் ஈடுபட்டுள்ளனா் என தெரிவித்துள்ளாா்.