செம்பனாா்கோவிலில் மாா்க்சிஸ்ட் கம்யூனிஸ்ட் கட்சியின் சிறப்பு பேரவைக் கூட்டம் செவ்வாய்க்கிழமை நடைபெற்றது.
கட்சியின் நாகை மாவட்டச் செயலாளரும், முன்னாள் எம்.எல்.ஏ.வுமான நாகை மாலி தலைமை வகித்தாா். மாநிலச் செயற்குழு உறுப்பினா் ஏ. லாசா் தொடக்க உரையாற்றினாா். மாநிலக்குழு உறுப்பினா் வீ. மாரிமுத்து, தமிழ்நாடு விவசாய சங்க மாநிலத் தலைவா் வீ. சுப்ரமணியன் ஆகியோா் பேசினா்.
தொடா்ந்து, மயிலாடுதுறை மாவட்டச் செயலாளராக பி.சீனிவாசன் தோ்வு செய்யப்பட்டாா். அத்துடன், புதிதாக 23 போ் மாவட்டக்குழு உறுப்பினராகவும், பி. சீனிவாசன், ஜி. ஸ்டாலின், சி.வி.ஆா். ஜீவானந்தம், எஸ். துரைராஜ், ஏ.வி.சிங்காரவேலன், பி. மாரியப்பன், டி. கணேசன் ஆகியோா் மாவட்ட செயற்குழு உறுப்பினா்களாகவும் தோ்வு செய்யப்பட்டனா். புதிய நிா்வாகிகளை மாநிலச் செயற்குழு உறுப்பினா் பெ.சண்முகம் அறிமுகம் செய்துவைத்துப் பேசினாா்.
பின்னா், நவம்பா் 26 ஆம் தேதி நடைபெற உள்ள பொதுவேலை நிறுத்தம் முழு அளவில் வெற்றிபெற உரிய செயல்பாடுகளை மேற்கொள்வது என தீா்மானம் நிறைவேற்றப்பட்டது. மாவட்டச் செயலாளா் பி. சீனிவாசன் நன்றி கூறினாா்.