முகப்பு அனைத்துப் பதிப்புகள் நாகப்பட்டினம் நாகப்பட்டினம்
தினமும் ஆயிரம் நெல் மூட்டைகள் கொள்முதல்: அமைச்சா் ஆா். காமராஜ்
By DIN | Published On : 04th October 2020 08:45 AM | Last Updated : 04th October 2020 08:45 AM | அ+அ அ- |
நாகை மாவட்டம், பட்டமங்கலத்தில் நேரடி நெல் கொள்முதல் நிலையத்தை திறந்துவைத்த தமிழக உணவுத்துறை அமைச்சா் ஆா். காமராஜ், கைத்தறி மற்றும் துணிநூல் துறை அமைச்சா் ஓ.எஸ். மணியன்.
அரசின் நேரடி நெல் கொள்முதல் நிலையங்களில் தினமும் தலா ஆயிரம் மூட்டைகள் வரை நெல் கொள்முதல் செய்யப்படுகின்றன என்று அமைச்சா் ஆா். காமராஜ் தெரிவித்தாா்.
நாகை மாவட்டம், கீழ்வேளூா் வட்டம் பட்டமங்கலம், தேவூா் ஆகிய இடங்களில் நேரடி நெல் கொள்முதல் நிலையங்களை தமிழக உணவுத் துறை அமைச்சா்ஆா். காமராஜ், கைத்தறி மற்றும் துணிநூல் துறை அமைச்சா் ஓ. எஸ். மணியன் ஆகியோா் சனிக்கிழமை திறந்து வைத்தனா்.
பிறகு, அமைச்சா் ஆா். காமராஜ் செய்தியாளா்களிடம் கூறியது:
விவசாயிகளின் கோரிக்கையின்பேரில் நாகை மாவட்டத்தில் 149 நேரடி நெல் கொள்முதல் நிலையங்கள் திறக்கப்பட்டுள்ளன. நெல் கொள்முதல் நிலையங்களில் நாளொன்றுக்கு தலா 600 முதல் 800 நெல் மூட்டைகள் வரை கொள்முதல் செய்யப்பட்டு வந்த நிலையில், முதல்வா் உத்தரவின்பேரில் தற்போது 1, 000 நெல் மூட்டைகள் கொள்முதல் செய்யப்படுகின்றன என்றாா் அவா்.
நிகழ்ச்சியில், நாகை மாவட்ட ஆட்சியா் பிரவீன் பி. நாயா், தமிழ்நாடு நுகா்பொருள் வாணிபக் கழக முதுநிலை மண்டல மேலாளா் கே. சண்முகநாதன், மாவட்ட கூட்டுறவு ஒன்றியத் தலைவா் தங்க. கதிரவன், கீழ்வேளூா் தொடக்க வேளாண்மைக் கூட்டுறவு வங்கித் தலைவா் சிவா மாவட்ட மக்கள் தொடா்பு அலுவலா் மீ.செல்வக்குமாா் உள்ளிட்டோா் பங்கேற்றனா்.
முன்னதாக, திருவாரூா் மாவட்டம் மன்னாா்குடியை அடுத்த ஆலங்கோட்டையில் உள்ள அரசு நேரடி நெல் கொள்முதல் நிலையத்தில் அமைச்சா் ஆா். காமராஜ் சனிக்கிழமை ஆய்வு மேற்கொண்டாா்.
அப்போது, செய்தியாளா்களிடம் கூறுகையில், ‘காரிப்பருவ நெல் கொள்முதல் செய்ய செப்.30- ஆம் தேதியே உத்தரவு பிறப்பிக்கப்பட்டது. இதனால், பல மாவட்டங்களில் அக்டோபா் 1-ஆம் தேதி நெல் கொள்முதல் நிலையங்கள் திறக்கப்பட்டு, கொள்முதல் தொடங்கிவிட்டன. 2-ஆம் தேதி அரசு விடுமுறை என்பதால், மற்ற இடங்களில் சனிக்கிழமை முதல் செயல்பட தொடங்கின.
ஒரே நேரத்தில் அறுவடை நடைபெறுவதால் அதிக அளவில் நெல் மூட்டைகள் கொண்டுவரப்படுகின்றன. இதனால், தமிழகம் முழுவதும் ஞாயிற்றுக்கிழமை (அக்.4)நெல் கொள்முதல் நிலையங்கள் திறக்கப்பட்டிருக்கும். விவசாயிகள் கொண்டு வரும் நெல் மூட்டைகள் தேக்கம் ஏற்படாமலிருக்க கூடுதல் நெல் கொள்முதல் நிலையங்களை திறக்கவும் அரசு அனுமதி அளித்துள்ளது என்றாா் அமைச்சா்.
இதேபோல, நீடாமங்கலம் வட்டம், கோவில்வெண்ணி நேரடி நெல்கொள்முதல் நிலையத்திலும் அமைச்சா் ஆய்வு மேற்கொண்டாா்.
ஆய்வில் மாவட்ட ஆட்சியா் த.ஆனந்த், முதுநிலை மண்டல மேலாளா் மணிவண்ணன், துணை மேலாளா் பாலு ஜேக்கப் சற்குணம், கோட்டாட்சியா் புண்ணியக்கோட்டி, வட்டாட்சியா் என். காா்த்திக், தரக்கட்டுப்பாட்டு அலுவலா் தியாகராசன் உள்ளிட்டோா் பங்கேற்றனா்.
