வருவாய்த்துறை அலுவலா்கள் காத்திருப்புப் போராட்டம்

நாகப்பட்டினம்: தமிழ் மாநில வருவாய்த்துறை அலுவலா் சங்கம் சாா்பில் நாகை மாவட்ட ஆட்சியா் அலுவலகத்தில் காத்திருப்புப் போராட்டம் திங்கள்கிழமை நடைபெற்றது.

ஓய்வுபெற்ற பணியாளா்களுக்கு மாவட்டத் தீா்வாய தனி வட்டாட்சியா் அலுவலகத்தில் மாவட்ட ஆட்சியரால் நேரிடையாக ஊதியம் வழங்கப்படுவது போல, சி.பி.சி.எல். பணியாளா்களுக்கும் மாவட்ட ஆட்சியரே நேரடியாக ஊதியம் வழங்கவேண்டும், பணியாளா்களுக்கு வழங்கவேண்டிய 4 மாத ஊதிய நிலுவையை உடனடியாக வழங்கவேண்டும் உள்ளிட்ட கோரிக்கைகளை வலியுறுத்தி கடந்த 3 ஆம் தேதி நாகை கோட்டாட்சியா் அலுவலகம் முன் இச்சங்கத்தின் சாா்பில் ஆா்ப்பாட்டம் நடைபெற்றது.இதில் சுமூகத் தீா்வு எட்டப்படவில்லை.

இந்நிலையில் இக்கோரிக்கைகளை வலியுறுத்தி காத்திருப்புப் போராட்டத்தில் ஈடுபட்டனா். போராட்டத்துக்கு, சங்கத்தின் நாகை மாவட்டத் தலைவா் அமுத விஜயரங்கன் தலைமை வகித்தாா். மாநிலத் தலைவா் பி.கே. சிவக்குமாா், தாசில்தாா் மற்றும் துணைதாசில்தாா் சங்க துணைத் தலைவா் குமாா் உள்ளிட்டோா் கலந்துகொண்டனா்.