தமிழக அரசின் நலத் திட்ட உதவிகளால் கல்வி கற்பதில் மாணவா்களைக் காட்டிலும் மாணவிகள் முதலிடம் வகிப்பதாக கைத்தறி மற்றும் துணிநூல் துறை அமைச்சா் ஓ.எஸ்.மணியன் தெரிவித்தாா்.
நாகை மாவட்டம் வேதாரண்யத்தை அடுத்த கருப்பலம்புலம் பி.வி. தேவா் அரசு உயா்நிலைப் பள்ளி, மேல்நிலைப் பள்ளியாக தரம் உயா்த்தப்பட்டுள்ளது. இதன் செயலாக்கம் புதன்கிழமை தொடங்கி வைக்கப்பட்டது. விழாவில் அமைச்சா் ஓ.எஸ். மணியன் பங்கேற்று மாணவா் சோ்க்கையைத் தொடங்கி வைத்து பேசியது:
தமிழகத்தில் நிகழ் கல்வியாண்டில் 35 அரசு நடுநிலைப் பள்ளிகள் உயா்நிலைப் பள்ளிகளாகவும், 40 உயா்நிலைப் பள்ளிகள் மேல்நிலைப் பள்ளிகளாகவும் தரம் உயா்த்தப்பட்டுள்ளன. பெண் கல்வியை ஊக்குவிக்கும் வகையில், முன்னாள் முதல்வா் ஜெயலலிதா கொண்டுவந்த திருமண உதவித்தொகை, தாலிக்கு தங்கம் போன்ற திட்டங்கள் பெண்களுக்கு உதவிகரமாக இருக்கின்றன.
இதனால் பாரதியாா் கண்ட கனவை நிறைவேற்றும் வகையில், தமிழகத்தில் 100 சதவீதம் பெண்கள் கல்வியில் முதலிடம் வகிக்கின்றனா். மாணவா்களை விட மாணவிகள் படிப்பில் நன்கு கவனம் செலுத்தி முன்னேறி வருகின்றனா். இதேபோல மாணவா்களும் படிப்பில் கூடுதல் கவனம் செலுத்தி, மாணவிகளை முந்த வேண்டும் என்றாா் அமைச்சா்.
நிகழ்ச்சிக்கு, நாகை மாவட்ட கூடுதல் ஆட்சியா் பிரசாந்த் தலைமை வகித்தாா். மாவட்ட முதன்மைக் கல்வி அலுவலா் புகழேந்தி, தலைமையாசிரியா் பழனியப்பன், மாவட்ட ஊராட்சி உறுப்பினா்கள் சுப்பையன், திலீபன், ஒன்றியக்குழுத் தலைவா் கமலா அன்பழகன், அகரம் பள்ளித் தாளாளா் பி.வி.ஆா். விவேக் வெங்கட்ராமன், ஊராட்சித் தலைவா் சுப்புராமன், ஒன்றியக்குழு உறுப்பினா் ராசிகண்ணு உள்ளிட்டோா் பங்கேற்றனா்.