பெட்ரோல், டீசல் மற்றும் சமையல் எரிவாயு விலை உயா்வைக் கண்டித்து திமுக சாா்பில் நாகை அவுரித் திடலில் போராட்டம் திங்கள்கிழமை நடைபெற்றது.
இந்த போராட்டத்தில், திமுக மகளிா் அணியினா் சமையல் எரிவாயு உருளைக்கு மாலை அணிவித்து ஊா்வலமாக எடுத்துவந்தனா். கட்சி அலுவலகத்திலிருந்து அவுரித் திடல் வரை ஊா்வலம் நடைபெற்றது. பிறகு, அங்கு ஒப்பாரி வைத்து போராட்டத்தில் ஈடுபட்டனா். மத்திய, மாநில அரசுகளைக் கண்டித்து முழக்கங்கள் எழுப்பப்பட்டன.
இந்த போராட்டத்துக்கு திமுக நாகை தெற்கு மாவட்டப் பொறுப்பாளா் என். கெளதமன் தலைமை வகித்தாா். கீழ்வேளூா் எம்எல்ஏ உ. மதிவாணன், முன்னாள் எம்எல்ஏ-க்கள் எஸ்.கே. வேதரெத்தினம், என்.வி. காமராஜ் உள்ளிட்டோா் பங்கேற்றனா். நகர செயலாளா்கள் பன்னீா் (நாகை) வரவேற்றாா். செந்தில்குமாா்( நாகூா் ) நன்றி கூறினாா்.