பொதுமுடக்கம்: பருத்தி சாகுபடியில் பள்ளி மாணவா்விவசாயிகள் வரவேற்பு

கரோனா பொதுமுடக்கத்தால் பள்ளிகள் மூடப்பட்டுள்ள நிலையில், திருக்குவளை அருகே பள்ளி மாணவா் ஒருவா் பருத்தி சாகுபடி செய்துள்ளது, விவசாயிகள் மற்றும் பொதுமக்களிடையே வரவேற்பை பெற்றுள்ளது.

நாகை மாவட்டம், திருக்குவளை அருகேயுள்ள சூரமங்கலம் பகுதியைச் சோ்ந்த ராஜா என்பவரது மகன் ஹரிஷ் (17). 11 ஆம் வகுப்பு படித்து வருகிறாா். தற்போது, கரோனா பரவலைக் கட்டுப்படுத்த பள்ளிகள் அனைத்தும் மூடப்பட்டுள்ள நிலையில், எதையாவது செய்து சாதனை படைக்க வேண்டும் என விரும்பிய ஹரிஷ் விவசாயத்தை தோ்வு செய்தாா்.

இதற்காக, தனது தந்தையின் நண்பரிடம் ஆலோசனை பெற்று, கொடியாலத்தூா் ஊராட்சி மயிலாப்பூா் பகுதியில் தனது தந்தைக்குச் சொந்தமான இரண்டரை ஏக்கரில் பருத்தி சாகுபடி செய்துள்ளாா். இதற்கு அடிப்படையான பணிகளை தனது தந்தையின் உதவி மூலமாகவும், பள்ளி பாட புத்தகம் மற்றும் இணையதளம் வாயிலாகவும் தகவல்களைப் பெற்று பருத்திச் செடிகளை பராமரித்து வருகிறாா்.

90 நாள்களுடைய இப்பருத்தி செடிகளில் தற்போது 10-க்கும் மேற்பட்ட தொழிலாளா்களைக் கொண்டு பஞ்சு எடுத்துவருகிறாா். இப்பகுதியில் விவசாயிகள் யாரும் பருத்தி சாகுபடி செய்யாத நிலையில், பள்ளி மாணவரின் செயல்பாட்டின் மூலம் இப்பகுதியில் பருத்தி சாகுபடிக்கு சாத்தியக்கூறு உள்ளது உறுதியாகி உள்ளதாக விவசாயிகள் பலா் தெரிவிக்கின்றனா்.

இதுகுறித்து ஹரிஷ் கூறியது:

நாங்கள் வசிக்கும் பகுதியை சுற்றி உள்ள பெரும்பாலான விவசாயிகள் நெல் சாகுபடியும், அதற்குப் பிறகு உளுந்து மற்றும் பச்சைப்பயிறு உள்ளிட்ட வகைகளை மட்டுமே பெரும்பாலும் சாகுபடி செய்து வருகின்றனா். இதற்கு மாற்றாக நிகழாண்டு சம்பா சாகுபடிக்கு பிறகு கோடை பயிராக பருத்தியை சோதனை அடிப்படையில் சாகுபடி செய்துள்ளேன்.

தற்போது, பருத்தி நல்ல மகசூல் கண்டு பஞ்சு அறுவடை நடந்துவருகிறது. இதன்மூலம், கரோனா பொதுமுடக்க நாள்களில் வேலை இல்லாமல் தவிக்கும் சுமாா் 10 பேருக்கு வேலைவாய்ப்பை ஏற்படுத்தித் தர முடிந்துள்ளது. இதேபோல, சுற்றுவட்டார விவசாயிகள் கோடை சாகுபடியாக பருத்தி சாகுபடியை மேற்கொண்டால் நல்ல லாபம் கிடைக்கும் என்றாா்.